Biełaruskaja partyja levych «Spraviadlivy śviet» płanuje vyłučyć kandydatam u prezidenty svajho staršyniu Siarhieja Kalakina.
Farmat udziełu ŭ prezidenckich vybarach budzie abmiarkoŭvacca na čarhovym spravazdačna-vybarnym źjeździe «Spraviadlivaha śvietu», jaki projdzie 23—24 maja ŭ Minsku, paviedamiŭ BiełaPAN namieśnik staršyni partyi Valeryj Uchnaloŭ.
Pavodle jaho słoŭ, 26 krasavika hetaje pytańnie abmiarkoŭvałasia na plenumie Centralnaha kamiteta partyi. «Pavodle našaha statuta kančatkovaje rašeńnie budzie prymać źjezd. Ale centralny kamitet užo pryniaŭ rašeńnie prapanavać źjezdu rašeńnie ab tym, što partyja «Spraviadlivy śviet» udzielničaje ŭ prezidenckich vybarach sa svaim kandydatam. Takim kandydatam źjezdu budzie prapanavana zaćvierdzić staršyniu partyi Siarhieja Kalakina», — paviedamiŭ Uchnaloŭ. Pavodle jaho słoŭ, vyłučeńnie Kalakina kandydatam u prezidenty padtrymała bolšaść partyjnych arhanizacyj, tamu, ličyć Uchnaloŭ, «hetaje rašeńnie, vierahodna, padtrymaje i źjezd». «Choć vyniki hałasavańnia na źjeździe, viadoma, prahnazavać składana», — dadaŭ jon.
«My razumiejem, što ciapier vybaraŭ u Biełarusi jak takich niama, — zajaviŭ palityk. — My prahnazujem, što sioleta naŭrad ci štości kardynalna źmienicca ŭ płanie padrychtoŭki i praviadzieńnia vybaraŭ. Tym nie mienš, my vyrašyli iści na ich. A kali budzie zusim poŭnaje biaźmiežža z boku ŭłady (nie buduć davać stavić pikiety, buduć prasavać členaŭ inicyjatyŭnaj hrupy), my ŭ luby momant možam pryniać rašeńnie pra vychad z kampanii», — skazaŭ Uchnaloŭ.
Siarhiej Kalakin užo vyłučaŭsia kandydatam u prezidenty ŭ 2001 hodzie, adnak źniaŭ svaju kandydaturu na karyść Uładzimira Hančaryka.
