«Ciapier havorka idzie nie pra baraćbu za ŭładu — havorka idzie pra zachavańnie Biełarusi na palityčnaj karcie śvietu jak niezaležnaj samastojnaj dziaržavy. Mnohija z tych, kaho napałochali padziei va Ukrainie, paśpiašalisia zapeŭnić siabie, što ciapierašni biełaruski režym moža słužyć harantam niezaležnaści našaj krainy», — havorycca ŭ zajavie partyi.

«Siarod ich apynulisia i niekatoryja zachodnija palityki, jakija pavieryli pakaznym, byccam by «prazachodnim», dziejańniam režymu. Jany hatovyja pryznać vybary, jany hatovyja pryznać ciapierašni režym lehitymnym biez svabodnych, sumlennych vybaraŭ.

(…) U Biełarusi mižnarodnaje pryznańnie režymu budzie aznačać toje, što jon atrymaje zaraz užo absalutnuju ŭładu nad krainaj. I adnym rosčyrkam piara jon moža pazbavić biełarusaŭ apošniaj nadziei na budučyniu. Jamu dla hetaha nieabchodna tolki adno: tak pravieści vybary, kab ich pryznała mižnarodnaja supolnaść», — padkreślivaje AHP.

 «My bačym, što mnohija viadomyja ludzi admovilisia ad baraćby, a šerah apazicyjnych sił hatovyja padyhrać režymu. Tym samym jany — volna ci mimavoli — pavialičvajuć šancy režymu na pryznańnie», — śćviardžajecca ŭ zajavie.

«U hetaj situacyi AHP zajaŭlaje ab vyłučeńni kandydatam u prezidenty Staršyni partyi Labiedźka Anatola Uładzimiraviča.

My ŭśviedamlajem svaju adkaznaść i, u vypadku zachavańnia isnujučaj praktyki praviadzieńnia kampanij, nie staniem masoŭkaj ŭ rychtavanym śpiektakli». 

Raniej pra mahčymy ŭdzieł u vybarčaj kampanii zajavili pieršy namieśnik TBV Alena Anisim i aktyvist kampanii «Havary praŭdu» Taćciana Karatkievič. Partyja BNF i BSDP padtrymali kandydaturu Karatkievič.

Čarhovyja prezidenckija vybary pavinny prajści ŭ Biełarusi nie paźniej za 20 listapada. Najbolš vierahodnaj dataj ich praviadzieńnia ŭ CVK nazyvali 15 listapada.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?