Sud nad palitviaźniem Mikałajem Statkievičam pa źmienie režymu adbyćcia pakarańnia – z zamienaj jaho na turemny, prajšoŭ u paniadziełak, 4 maja, u Škłoŭskaj papraŭčaj kałonii №17.
Padstavaju dla źmieny režymu stali «šmatlikija parušeńni praviłaŭ unutranaha rasparadku kałonii i niepadparadkavańnie patrabavańniam kiraŭnictva».
Viečaram sudździa Škłoŭskaha rajonnaha suda Barancava pryznała Mikałaja Statkieviča vinavatym u parušeńni praviłaŭ unutranaha rasparadku kałonii i pryniała rašeńnia nakiravać palitviaźnia da skančeńnia terminu źniavoleńnia ŭ turmu, a heta 1 hod, 7 miesiacaŭ i 15 dzion, paviedamlaje spring96.org
Advakat Alaksandr Halijeŭ paviedamiŭ «Našaj Nivie», što pakul nieviadoma, dzie heta budzie adbyvacca. «Kali Statkievič prybudzie ŭ miesca źniavoleńnia, administracyja budzie abaviazanaja paviedamić svajakam pra jahonaje miescaznachodžańnie. Adpaviedna, budziem sami turbavać ich», — skazaŭ sp. Halijeŭ.
***
Mikałaj Statkievič — adziny z byłych kandydataŭ u prezidenty, jaki ŭtrymlivajecca dahetul u turmie paśla prezidenckich vybaraŭ 2010 hodu. Sud pryznaŭ apazycyjnaha palityka vinavatym u arhanizacyi vuličnych biesparadkaŭ i asudziŭ na 6 hadoŭ źniavoleńnia. Mikałaj Staktievič nie pryznaŭ siabie vinavatym i admoviŭsia padavać na imia Łukašenki prašeńnie ab pamiłavańni. Mikałaj Statkievič adbyvaŭ pakarańnie ŭ škłoŭskaj kałonii, zatym rašeńniem sudu ad 12 studzienia 2012 h. umovy adbyćcia pakarańnia byli źmienienyja na bolš žorstkija, jaho pieraviali z kałonii №17 u Škłovie ŭ turmu №4 h. Mahilova.
12 studzienia 2015 hoda byŭ etapavany dla dalejšaha adbyćcia pakarańnia ŭ škłoŭskuju papraŭčuju kałoniju №17.
