Skandalnym va ŭsich sensach atrymałasia sustreča čaćviortaha tura čempijanatu Biełarusi pa futbole pamiž hrodzienskim «Niomanam» i barysaŭskim BATE.
Fota Raman Aleška, by.tribuna.com.
Fota Raman Aleška, by.tribuna.com.
Fota Raman Aleška, by.tribuna.com.
Čempijon Biełarusi niaspynna atakavaŭ na praciahu ŭsioj hulni. Za 90 chvilin matča barysaŭcami było naniesiena až 34 udary pa varotach haspadaroŭ. Praŭda, miač uparta nie pierasiakaŭ liniju varatarskaj.
Napeŭna, značnaja častka zaŭziataraŭ BATE zhubiła nadzieju, što ichni kłub atrymaje pieramohu. Ale ŭžo ŭ kampiensavany čas arbitr pryznačyŭ vielmi sprečny štrafny ŭdar. Arbitr Michaił Łaŭski ŭhledzieŭ hulniu rukoj abaroncy Zabielina ŭ momancie, kali ŭ bok varotaŭ prabivaŭ Alaksandr Karnicki.
Ihar Stasievič filihranna vykanaŭ štrafny – 1:0. Času ŭ «Niomana», kab adyhracca nie było zusim.
Varta adznačyć, što pry videaprahladzie momanta z pryznačeńniem štrafnoha hulni rukoj sapraŭdy nie vidać, ale videa, pryčym nie nadta jakasnaje, nie moža być dokazam.
Hałoŭny trenier «Niomana» Siarhiej Saładoŭnikaŭ adznačyŭ: «Składana kamientavać matč. Viadoma, u nas niama pretenzij da futbolnaha kłubu BATE, da chłopcaŭ, da kiraŭnictva. My viedajem ich pryncypy. Ale toje, što zrabiŭ hetym śvistkom Łaŭski na apošnich chvilinach - heta prosta niezrazumieła! Niachaj zojdzie ŭ raździavalniu i pahladzić, jak chłapčuki 94, 95, 96 hoda zaraz płačuć tam!»
U spravazdačy ab matčy na aficyjnym sajcie BATE adznačajecca, što hulnia rukoj była, a jašče Łaŭski dvojčy nie pryznačyŭ pienalci ŭ varoty hrodziencaŭ.
Karaciej, hradus matč nakaleny da miažy. Niervy zdavali navat u kiraŭnictva BATE. Staršynia praŭleńnia kłuba Anatol Kapski, viadomy svaim haračym charaktaram, u adnym z momantaŭ ledź nie ŭstupiŭ u bojku ź ziaŭziatarami «Niomana», ale ŭsio abmiežavałasia vusnaj pierapałkaj. Hety momant zafiksavaŭ fatohraf Raman Aleška, a jahony repartaž byŭ apublikavany na sajcie by.tribuna.com.
Jak by toje ni było, ale vynik matč užo budzie niaźmienny. A voś sudździa Łaŭski jašče budzie čakać, jak jahonuju pracu aceniać u fiederacyi.
