Zbornaja Biełarusi pa chakiei praviała treciuju sustreču na čempijanacie śvietu, jaki ciapier prachodzić u Čechii. Siońnia ŭ Ostravie našy chłopcy sustrakalisia z Danijaj.
Fota Siarhieja Zinina.
Varta adznačyć, što heta zbornyja prykładna adnaho ŭzroŭniu. Da datčan na čempijanat taksama nie pryjechali ich zaakijanskija zorki. Bukmiekiery ž addavali nievialikuju pieravahu biełarusam.
Pieršy pieryjad paćvierdziŭ toj fakt, što sustrakajucca roŭnyja kamandy. Chacia dziela spraviadlivaści varta adznačyć, što datčanie atakavali krychu čaściej i bolš niebiaśpiečna. I na 13-aj chvilinie Jakabsan vyvieŭ svaju kamandu napierad – 1:0.
Pieršy pieryjad i skončyŭsia takim likam. Zdavałasia, treba čakać upartaj baraćby ŭ astatnija 40 chvilin. Ale niečakana biełarusy całkam pierachapili inicyjatyvu.
Nie paśpieŭ druhi pieryjad pačacca, jak Artur Haŭrus zrabiŭ ličby na tabło roŭnymi. Na 27-aj chvilinie Jaŭhien Kavyršyn prymusiŭ biełaruskich zaŭziataraŭ u druhi raz pieramožna ŭskinuć ruki. A jašče praź dźvie chviliny Illa Šynkievič zakinuŭ treciuju našu šajbu. Paśla hetaha datčanie tak i nie zmahli pryjści ŭ siabie.
Biełarusy jašče dvojčy adznačalisia trapnymi kidkami, jany na rachunku ŭsio taho ž Kavyršyna, a taksama abaroncy Ivana Usienki – 5:1. Zvyšupeŭnienaja pieramoha. Zrobleny jašče adzin krok u nakirunku čverćfinału čempijanatu.
Varta adznačyć, što na trybunach było dobra vidać niekalki bieł-čyrvona-biełych ściahoŭ, a taksama vialikaja raściažka na łacincy Žyvie Biełaruś!
7 maja naša kamanda praviadzie nastupnuju hulniu suprać zbornaj ZŠA. Pačatak a 17:15.
