Alaksandr Łukašenka patrabuje pryniaćcia mier pa zachavańni pracoŭnych kalektyvaŭ na pradpryjemstvach. Takuju zadaču jon pastaviŭ 5 maja, prymajučy z dakładam ministra pracy i sacyjalnaj abarony Marjanu Ščotkinu, paviedamili ŭ pres-słužbie biełaruskaha lidara.
«Heta prablema bolš za ŭsio datyčyć ministra pramysłovaści. Ale chacieŭ by i vas papiaredzić, kab vy va ŭradzie za hetym pytańniem panazirali i ažyćciavili kantrol. U nas na niekatorych davoli bujnych pradpryjemstvach pa peŭnych pryčynach, nie budu ich nazyvać, my ŭžo nie raz ab hetym havaryli, skłałasia vielmi napružanaja situacyja, abstanoŭka, — adznačyŭ kiraŭnik dziaržavy. — My ni ŭ jakim razie nie pavinny dapuścić taho, kab ich stracić. Heta vyklučana».
Pavodle słoŭ Alaksandra Łukašenki, tut treba pryniać kompleks mier.
«Ale samaja hałoŭnaja miera, i vy pavinny za hetym sačyć, — zachavać pracoŭnyja kalektyvy. Kryzisy niekali skončacca, rana ci pozna, my hetyja kryzisy pieražyvali ŭžo nie raz, ale kali vychodziš z kryzisu i na tvaju pradukcyju jość popyt, a niama rabočaha ludu, niama rabočaha kłasa, jaki vyrablaŭ hetu pradukcyju, tady biada. Tamu lubymi sposabami i srodkami treba zachavać pracoŭnyja kalektyvy, zrabić usio dla taho, kab ludzi pracavali», — padkreśliŭ jon.
U toj ža čas Łukašenka padkreśliŭ, što heta nie datyčycca «tak zvanych pjanic i razhildziajaŭ». «Kali jany siońnia nie razumiejuć situacyju i praciahvajuć heta razhildziajstva, im nie miesca ŭ pracoŭnych kalektyvach. Ale, znoŭ ža, ja papiaredziŭ kiraŭnikoŭ i ministra: pad hetu katehoryju asob zahaniać nievinavatych ludziej kateharyčna zabaraniaju!», — skazaŭ kiraŭnik dziaržavy.
