Fota: Alaksandr Arsionaŭ, IT.TUT.BY
Z 4 maja ŭ sietcy life:) źmianiŭsia sihnał spaviaščeńnia pra pieranos numara abanienta ŭ sietku inšaha apieratara. Zamiest hałasavoha paviedamleńnia life:) pakinuŭ karotki hudok. Toje samaje jon na staronkach Onliner.by prapanavaŭ zrabić inšym apierataram. MTS i velcom paličyli, što minimalistyčny hudok nie daje dastatkovaj infarmacyi abanientu — u adroźnieńnie ad paviedamleńnia z čatyroch słoŭ.
U adkaz na admovu kankurentaŭ life:) zajaviŭ, što kłopat pra abanientaŭ «maje prajaŭlacca ŭ źnižeńni koštaŭ telefanavańniaŭ u inšyja sietki».
«Nie daŭžynia, jak zhadvałasia ŭ adkazach apierataraŭ, a farmat vyklikaje błytaninu, — nastojvaje life:). — U hetaj płoskaści, kažučy pra kłopat, my zaklikajem apierataraŭ hladzieć na sutnaść: na cenavuju palityku. Zručny farmat infarmavańnia ŭ dadzienym vypadku varta razhladać jak nastupnuju, bolš vysokuju stupień hetaha kłopatu».
Apieratar śćviardžaje, što byŭ inicyjataram uviadzieńnia pasłuhi pieranosu numara (adsutnaść takoj pasłuhi ŭ Rasii nazyvali «mabilnym rabstvam»), zapuščanaj u Biełarusi 1 lutaha 2012 hoda. Life:) kaža, što ŭ jaho sietku svaje numary pieranieśli 24 tysiačy abanientaŭ, a ź jaje — 1,8 tysiačy.
Abanienty, jak śćviardžaje apieratar, prasili skasavać hałasavoje paviedamleńnie pra pieranos numara. Jano nibyta vyklikaje asacyjacyi ź inšym paviedamleńniem — pra niedasiažnaść abanienta. Dy hetaje paviedamleńnie vystaŭlajecca tym apierataram, ad jakoha byŭ pieraniesieny numar, a nie tym, da kaho jon byŭ pieraniesieny.
Paviedamleńnie pra pieranos numaru začytvajecca aŭtainfarmataram da pačatku hudkoŭ, kab abanient, jaki nabiraje numar, byŭ prainfarmavany pra «niečakanuju» źmienu taryfaŭ — telefanavańni ŭ inšyja sietki ŭ MTS, velcom i na starych taryfach life:) kaštujuć zaŭvažna daražej za telefanavańni ŭ svajoj sietcy.
Čytajcie taksama: 9 sposabaŭ mienš płacić za mabilnik
