Švedzkaja pravaabarončaja arhanizacyja Östgruppen miarkuje, što kiraŭnica pradstaŭnictva EZ u Biełarusi Majra Mora dziejničaje ŭ parušeńnie asnovatvornych kaštoŭnaściaŭ i aficyjnaj palityki EZ.
Tamu jana pavinna być vyzvalena ad pasady, ličyć Östgruppen. Švedzkija pravaabaroncy zaklikajuć svoj urad padniać hetaje pytańnie ŭ EZ.
«Zamiest taho kab vyrazna vykazać aficyjnuju liniju EZ u padtrymku demakratyi i pravoŭ čałavieka ŭ Biełarusi, Majra Mora nieadnarazova dziejničała takim čynam, što heta chutčej słužyła intaresu nielehitymnaha režymu Łukašenki. Tamu jana vyčarpała svoj kredyt davieru jak pradstaŭnik EZ», — kaža staršynia Östgruppens Marcin Uhła.
Majra Mora nia raz rasčaroŭvała demakratyčnyja siły ŭ Biełarusi svaimi publičnymi vystupami. Minułaj vosieńniu jana ŭziała ŭdzieł, naprykład, u tok-šoŭ «Dieło principa» na dziaržaŭnym telekanale, zaklikajučy, kab usie biełarusy padtrymali prezydenta Łukašenku.
Na dniach Majra Mora ŭziała ŭdzieł u tym ža tok-šoŭ i pachvaliła tam Łukašenku za jahonaje ŭmieńnie «kamunikavać z narodam». U toj ža čas jana nie ahučyła aficyjnyja patrabavańni EZ da biełaruskaha režymu — vyzvalić usich palityčnych źniavolenych, choć u jaje naŭprost spytali, što ŭ ciapierašniaj sytuacyi pieraškadžaje supracoŭnictvu EZ i Biełarusi.
U toj ža dzień adbyvaŭsia sud nad samym viadomym palityčnym źniavolenym u krainie, eks-kandydatam u prezydenty Mikałajem Statkievičam. Pravaabaroncaŭ i pradstaŭnika EZ nie dapuścili na pasiedžańnie sudu, dzie Statkieviču prysudzili bolš žorstkija ŭmovy adbyćcia pakarańnia da kanca terminu źniavoleńnia.
Pry Majry Mory reputacyja pradstaŭnictva EZ u Miensku siarod biełaruskich demakratyčnych siłaŭ značna pahoršyłasia. Adčuvajecca vidavočnaje niežadańnie pradstaŭnictva ŭdzielničać u kantekstach, źviazanych z demakratyjaj i pravami čałavieka.
Heta chvaluje Östgruppen. Tamu arhanizacyja zaklikaje ŭrad Švecyi padniać hetaje pytańnie ŭ EZ.
Švedzki ministar zamiežnych spraŭ Marhot Vałstrem raniej skazała, što palityka Švecyi i EZ datyčna Biełarusi pavinna vyrazna zaniać pazycyju za demakratyju i pravy čałavieka. Hetaje imknieńnie pavinna adnosicca i da pradstaŭnictva EZ u Biełarusi, kaža Marcin Uhła.
U pradstaŭnictvie Eŭraźviazu ad kamentaroŭ ustrymlivajucca. Svabodzie zajavili, što, mahčyma, prakamentujuć paźniej, kali paznajomiacca z tekstam.