Matyjas Miliryn. Fota: Dean Takahashi, venturebeat.com
Matyjas Miliryn, hienieralny dyrektar finskaj studyi Remedy, pierajšoŭ na pracu ŭ biełaruskuju kampaniju Wargaming, paviedamlaje Gamesindustry.biz.
Pabačyć Miliryna ŭ Biełarusi naŭrad ci atrymajecca — fina pryvabiŭ klimat Kipra, dzie mieścicca štab-kvatera Wargaming.
Miliryn pakinuŭ Remedy paśla 15 hod pracy tam. Miesca hiendyrektara zojmie suzasnavalnik kampanii Markus Maki. Jak kaža Miliryn, jaho zychod nie paŭpłyvaje na vychad nastupnaha prajektu Remedy, šutera Quantum Break.
Pry im stvaralisia paśpiachovyja sieryi hulniaŭ Max Payne i Alan Wake, viadomyja chitra zakručanym siužetam i dobra prapracavanymi piersanažami adzinočnaj hulni. Što Miliryn budzie rabić u Wargaming, čyje anłajn-hulni nie majuć siužetu i piersanažaŭ u pryncypie, jon abiacaje raspavieści ŭ bližejšyja tydni.
«[Hulni kłasu] AAA zaŭsiody mnie padabalisia, ale ja spytaŭ siabie, kali ŭ apošni raz ja rabiŭ niešta novaje? — tłumačyć jon. — Zdajecca, heta słohan niejkaj słabieńkaj avijakampanii, što ja bačyŭ u Chitroŭ, ale jon zastraŭ u mianie ŭ hałavie».
Pa słovach Miliryna, jon vyrašyŭ źmianić i miesca žycharstva, i napramak dziejnaści. Wargaming uraziŭ jaho vynikami, jakich kampanija dasiahnuła va ŭmoŭna-biaspłatnych hulniach, jon praniksia pavahaj da kamandy Viktara Kisłaha.
