Źleva: limfatyčnaja sistema, jak jaje malujuć siońnia. Sprava: jak pryjdziecca malavać ciapier. Vyjava: University of Virginia Health System
Daśledčyki ŭniviersiteta sistemy achovy zdaroŭja Virdžynii, ZŠA, znajšli pramuju suviaź miž mozham i imunnaj sistemaj: limfatyčnyja sasudy iduć naŭprost u mozh, piša Neuroscience News sa spasyłkaj na daśledavańnie, što budzie chutka apublikavanaje ŭ časopisie Nature.
Raniej było niezrazumieła, jak limfatyčnaja sistema ŭzajemadziejničaje z mozham. Z adkryćciom limfatyčnych sasudaŭ u mozhu pryjdziecca pierapisvać padručniki anatomii.
Vyjaviłasia, što jaje sasudy tysiačy hod «chavalisia» ad daśledčykaŭ čałaviečaha cieła ŭ mozhavaj abałoncy pobač z kryvianosnymi sasudami. Heta zaŭvažyŭ prafiesar Antuan Łuvo, kali daśledavaŭ ćviorduju mozhavuju abałonku myšy i prydumaŭ sposab uskryćcia, pry jakim hetaja abałonka zastajecca cełaj.
Navukoŭcy kažuć ab svaim ździŭleńni adkryćciu: mietodyka była nie takoj składanaj — dziŭna, što stolki raznastajnych daśledavańniaŭ (u tym liku mahnitna-rezanansnaja tamahrafija) nie pakazali navukoŭcam sasudy limfatyčnaj sistemy.
Limfatyčnaja sistema vykonvaje važnuju rolu ŭ abmienie rečyvaŭ, ačystcy tkanak i kletak arhanizmu, a taksama ŭ rabocie imunnaj sistemy. Toj fakt, što mienavita jana ŭzajemadziejničaje z hałaŭnym mozham, moža dać adkazy na mnohija pytańni.
U pryvatnaści, dalejšyja daśledavańni mohuć pakazać šlachi lekavańnia chvaroby Alchiejmiera (mahčyma, jaje pryčynami jość jakraz «niepaładki» limfatyčnaj sistemy), a taksama raśsiejanaha sklerozu i navat aŭtyzmu.
