Z 3 červienia słuchačy zaŭvažyli adsutnaść prahram i rekłamy ŭ efiry stancyi «Alfa Radyjo». Na praciahu apošnich dvuch sutak tranślujecca tolki muzyka. Dyrektar «Alfy» śćviardžaje, što pryčyna źniaćcia prahram z efiru — u pieraasnaščeńni stancyi z prychodam novaha ŭładalnika.
Z pačatku hetaha hoda adna z najstarejšych radyjostancyj Biełarusi «Alfa Radyjo» ŭvajšła ŭ skład vydavieckaha doma na bazie haziety «SB. Biełaruś Siehodnia» zhodna z pastanovaj urada №1083 ad 19 listapada. Viasnoj 2003 hoda kantrolny pakiet akcyj radyjostancyi pieradaŭ u apieratyŭnaje kiravańnie Mininfarmu jaho były ŭładalnik — fond padtrymki pradprymalnikaŭ pry Ministerstvie pradprymalnictva i inviestycyj. Astatnija 49% naležać pryvatnaj kampanii «Biez prablem».
U internecie źjavilisia čutki pra toje, što mienavita novamu ŭładalniku naležyć inicyjatyva z 3 červienia tranślavać na radyjo tolki muzyku. A ŭsim supracoŭnikam nibyta prapanavana syści ŭ adpačynak da kanca leta (inšym — navat zvolnicca). Taksama ŭ sietcy ahučvałasia niepaćvierdžanaja infarmacyja ab tym, nibyta rekłamadaŭcaŭ pastavili pierad faktam tolki ŭ dzień spynieńnia viaščańnia.
Adzin z namieśnikaŭ hałoŭnaha redaktara haziety «Savieckaja Biełaruś» Siarhiej Pieluškievič (jaki zaraz kuryruje pracu stancyi) z hetaj nahody admoviŭsia što-niebudź tłumačyć žurnalistam TUT.BY:
«My pakul ničoha nie kamientujem».
Na samoj stancyi «Alfa Radyjo» kažuć, što z učorašniaha dnia pačata maštabnaje pieraasnaščeńnie, a redakcyja z hetaha času nie adkazvaje za efir:
«Ja dyrektar [radyjostancyi] - ale mnie patłumačyć vam niama čaho, - skazaŭ Jaŭhien Płotnikaŭ. —
My, naprykład, z 3-ha čysła za efir nie adkazvajem. U nas niama efiru. Usie pravy pieradadzienyja ŭ «Sovietskuju Biełoruśsiju».
jany ŭłaśniki, razumiejecie. Učora byli niejkija techničnyja zboi, ale ŭsio było adnoŭlena. Nie bolš za toje. Tak, zaraz tranślujecca tolki muzyka. Pačynajucca ramontnyja raboty vialikija. Ludzi syšli ŭsie ŭ adpačynki, u čarhovyja adpačynki — jak zvyčajna. A jak pracavać, kali iduć ramontna-adnaŭlenčyja raboty? My ciapier hetyja rečy nie vyrašajem. Nu, ramont i ramont — buduć pieraabstaloŭvajecca. Pa-mojmu, ničoha asablivaha — zvyčajnaja pracedura pieraasnaščeńnia pa rašeńni ŭłaśnika. Tut usio [ abstalavańnie] było znošana dzieści paradku na 98%».
Na dumku Płotnikava, mienavita pieraasnaščeńnie stancyi i jość pryčyna «ŭrezanaha» efiru. Kazać pra pierśpiektyvy pracy radyjostancyi paśla dadzienaha etapu tam nie biarucca:
«Z 3-ha čysła my asabista, ZAT «Alfa Radyjo», dačynieńnia nijakaha nie majem da radyjočastotnaha śpiektru».
Surazmoŭca taksama adznačyŭ, što kampanija nie zaklučała kantraktaŭ z rekłamadaŭcami na červień - hetaje pytańnie było praduhledžana zahadzia.