U Minsku znajšoŭsia haspadar skrutka z $1800, jaki znajšoŭ minak i zdaŭ u milicyju tydzień tamu, paviedamlaje HUUS Minharvykankama.
3 červienia na sajcie staličnaj milicyi źjaviłasia infarmacyja pra toje, što 29 maja pryblizna ŭ 19.00 na praśpiekcie Niezaležnaści, u rajonie doma № 95a, minčanin znajšoŭ u travie kala tratuara skrutak z hrašyma. Znachodku mužčyna adrazu ž adnios u Pieršamajskaje RUUS. Z zajavaj u milicyju da taho času nichto nie źviartaŭsia.
Paśla źjaŭleńnia hetaha paviedamleńnia ŭładalnik zhublenych hrošaj znajšoŭsia. Jon raskazaŭ, što 29 maja vielmi śpiašaŭsia. Hrošy pakłaŭ u zadniuju kišeniu štanoŭ razam z mabilnym telefonam. U toj momant, kali dastavaŭ telefon, vidać, i vypaŭ skrutak z hrašyma. Kali ŭbačyŭ prapažu hrošaj, viarnuŭsia i sprabavaŭ sam znajści ich, ale biespaśpiachova.
Uładalnik hrašovych srodkaŭ vykazaŭ udziačnaść za prystojnaść i sumlennaść maładomu čałavieku, jaki prynios u milicyju znojdzienyja hrošy. U svaju čarhu małady čałaviek (student), jaki znajšoŭ $1800, pryznaŭsia, što nikoli b nie prysvoiŭ čužyja hrošy, heta nie ŭ jaho praviłach.
