Prychadžanie pravasłaŭnaj carkvy Archanhieła Michaiła, raźmieščanaj u siale Chrustava niepryznanaj Prydniastroŭskaj Małdaŭskaj Respubliki, źniali videa z rytuałam «vyhnańnia demanaŭ» miascovym baciuškam.
Na im bačna, jak śviatar spačatku prakaciŭsia na mužčynie viarchom, zajaviŭšy, što jedzie «u Jerusalim, a potym na Afon», a paśla pačaŭ taptać jamu śpinu i šyju. «Hrešnik» płakaŭ, łajaŭsia, adpuskaŭ žarty i cikaviŭsia, čym siłkujecca baciuška. Apieratar maliŭsia, źviartajučysia to da adnaho, to da druhoha ŭdzielnika pracesu. Abrad praciahvaŭsia bolš za vosiem chvilin, paśla čaho šmatlikija hledačy prapanavali jaho paŭtaryć. Bačna, što dziejstva zabaŭlaje ludziej – jany nie chavajuć uśmiešak i viesiałości.
Nastajaciel carkvy Archanhieła Michaiła protaijerej Valeryj (Hałajda) viadomy tym, što sprabuje lačyć ad ałkahalizmu, narkamanii, viadźmarstva i ankałahičnych zachvorvańniaŭ malitvaj, śviatoj vadoj i saboravańniem, a taksama «aktyŭna praktykuje vyhnańnie demanaŭ». «U Prydniastroŭi, u siale Chrustava, u pravasłaŭnym chramie Archanhieła Michaiła słužyć mitraforny protaijerej Valeryj, u jakoha dar ad Boha dapamahać u bieznadziejnych situacyjach. Baciuška bačyć hrachi ludziej i dapamahaje žadajučym zazirnuć u svaju dušu, pryjści da pakajańnia i ščyraj viery ŭ Boha, biez čaho vylačeńnie niemahčyma», – pišuć pra nastajaciela chrama ŭ siecivie.
Małdoŭskija ŚMI paviedamili, što Mitrapolija Małdovy zacikaviłasia rolikam, asudziła toje, što adbyvajecca, bo jano mocna adroźnivajecca ad kananičnaha abradu, i paabiacała razhledzieć incydent na carkoŭnym sudzie.
