Były staršynia Minskaha harvykankama Mikałaj Ładućka atrymaŭ novaje pryznačeńnie. Ciapier čynoŭnik budzie kiravać «Motavieła».
«Naša Niva» ŭzhadvaje piać faktaŭ ź bijahrafii Ładućki.
Prafiesijny kamsamolec
Aficyjnaja bijahrafija Mikałaja Ładućki nie ŭtrymlivaje cikavych padrabiaznaściaŭ i niečakanych pavarotaŭ. Jon naradziŭsia ŭ Minsku ŭ 1959 hodzie. Cikava, što pra svaich baćkoŭ nikoli nie raskazvaŭ.
Ładućka advučyŭsia ŭ siaredniaj škole №40, paśla skončyŭ Biełaruski politechničny instytut. Hod jon papracavaŭ u budaŭnictvie i pačaŭ kamsamolskuju karjeru.
Sakratar kamiteta kamsamoła MAPIDa, pieršy sakratar Frunzienskaha rajkama kamsamoła, namieśnik zaviedujučaha adździełam kamsamolskich arhanizacyj CK ŁKSMB Minska…
Kali ŭ pačatku 1990-ych kamsamoł zhubiŭ papularnaść, Ładućka staŭ budaŭnikom. Ź ciaham času jon dasłužyŭsia da kiraŭnika načalnika budaŭničaha ŭpraŭleńnia-101 MAPIDa, a paśla ŭznačaliŭ najbujniejšy staličny rajon – Frunzienski.
U 2007-m Ładućka staŭ namieśnikam u tahačasnaha staršyni Minharvykankama Michaiła Paŭłava. Jon adkazvaŭ za budaŭnictva.
Kali ž Paŭłaŭ ciažka zachvareŭ, jahonyja abaviazki pierajšli da namieśnika. Ładućka byŭ vykanaŭcam abaviazkaŭ ceły hod. Kali ŭ jaho napramuju pytalisia, ci nie kryŭdna, što jamu nie daviarajuć, Ładućka saramliva advodziŭ vočy: «Značycca, tak vyrašyŭ prezident».
Tolki kali Paŭłaŭ pamior, Ładućku ŭsio ž pryznačyli staršynioj Minharvykankama. Stalicaj Biełarusi jon kiravaŭ piać z pałovaj hadoŭ.
Prychilnik uščylnieńnia
Jakimi idejami zapomniŭsia Ładućka žycharam stalicy? Kali Paŭłaŭ zaciata zmahaŭsia z pryvatnaj zabudovaj, to Ładućka padychodziŭ da hetaha pytańnia nie tak pryncypova. Niekatoryja rajony, jakija mierkavałasia znosić, atrymali prava na žyćcio.
Zatoje pry Ładućku raspaŭsiud atrymała «ŭščylnieńnie». Pasiarod dvaroŭ paŭstavali šmatpaviarchoviki MAPIDa, a pratesty miascovych žycharoŭ nie prynosili nijakaha plonu.
Samastojnaj palityki jon, viadoma ž, nie ažyćciaŭlaŭ. Samyja nieadnaznačnyja rašeńni, jak, naprykład, znos aŭtavakzała «Maskoŭski» prymalisia ŭ Administracyi prezidenta.
Saramlivy hienierał-major
U 2011-m Mikałaj Ładućka razam sa staršyniami abłvykankamaŭ staŭ hienierał-majoram. Čynoŭniki ŭznačalać «rady abarony» svaich rehijonaŭ. Ładućka ŭ vajskovaj formie vyhladaŭ asabliva kamična.
Padavałasia, što Łukašenka nie stavicca da staršyni Minharvykankama surjozna. Kiraŭnik dziaržavy pastajanna rabiŭ publičnyja vyvałački meru, a moh jaho i prynizić. Uziaŭšy niešta ŭ stałovaj, Łukašenka kivaŭ u bok Ładućki, maŭlaŭ, «jon zapłacić». Sam Ładućka pry hetym saramliva ŭśmichaŭsia i ciahnuŭsia za kašalkom.
Žychar kłubnaha doma
Zatoje naležnyja ŭmovy dla žyćcia Ładućka sabie arhanizavaŭ. Jon žyvie ŭ trochpakajovych apartamientach ahulnaj płoščaj kala 100 kvadratnym mietraŭ u zakrytym kvartale na vulicy Čarviakova ŭ Minsku.
Heta niezvyčajnaje miesca – adziny dvor, u jaki vypadkovy hość navat nie moža zajści padčas špacyru. Z usich bakoŭ kvartał abniesieny vysokim płotam, a miescy zajezdu aŭtamabilaŭ na parkoŭku zamknionyja na kluč.
Hety dom uzvodziła Upraŭleńnie kapitalnaha budaŭnictva Minharvykankama. A kiraŭnikom hetaj ustanovy ŭ siaredzinie 2000-ch jakraz i byŭ Ładućka.
Tak i nie pačaŭ budavać katedž
Padčas razdačy čynoŭnikam ziamli ŭ Viaśnincy adnym ź pieršych učastak adchapiŭ Mikałaj Ładućka. Adpaviednaje rašeńnie staršyni Minharvykankama (to bok samoha Ładućki) było padpisana 10 listapada 2011 hoda.
14 sotak ziamli aficyjna kaštavali bolš za $200 tysiač, adnak realna – pad miljon dalaraŭ. Ładućka ŭziaŭ sabie samy łasy kavałak, na pieršaj bierahavoj linii, za 100 mietraŭ ad vadaschovišča Drazdy. Raniej jahony nadzieł byŭ aharodam inšych žycharoŭ. Im vypłacili kampiensacyju.
Miažy miž nadziełam byłoha mera i tualetam raniejšych žycharoŭ niama.
Były mer pačaŭ budaŭnictva tolki paśla adstaŭki.
