Połackim pamiežnikam pryjšłosia ŭžyć zbroju pry zatrymańni hramadzian, jakija sprabavali parušyć dziaržaŭnuju miažu ŭ Brasłaŭskim rajonie, paviedamili ŭ pres-słužbie Połackaha pahraničnaha atrada.
Uviečary 4 červienia była atrymanaja infarmacyja ab znachodžańni ŭ miežach pamiežnaj zony ŭ Brasłaŭskim rajonie nieviadomych hramadzian. U chodzie pošukavych mierapryjemstvaŭ parušalniki byli znojdzienyja. Adnak jany praihnaravali patrabavańnie pamiežnikaŭ ab spynieńni i praciahvali ruch u bok miažy. Uličvajučy, što inšymi sposabami praduchilić parušeńnie miažy nie ŭjaŭlałasia mahčymym, starejšy pahraničnaha atrada papiaredziŭ pra mahčymaść prymianieńnia zbroi i ažyćciaviŭ adzin papieradžalny streł u pavietra z tabielnaj zbroi. U vyniku nieviadomyja ŭ kolkaści 5 čałaviek byli zatrymanyja. Praź niekatory čas byŭ zatrymany jašče adzin parušalnik.
Parušalnikami akazalisia hramadzianie Vjetnama, jakija prybyli ŭ Biełaruś z Rasii. Jany mieli namier pierajści biełaruska-łatvijskuju miažu z metaj pošuku lepšych umoŭ žyćcia ŭ Jeŭrasajuzie.
Zatrymanyja pryciahnutyja da adkaznaści za parušeńnie miažy, pamiežnaha režymu i parušeńnie praviłaŭ znachodžańnia ŭ respublicy. «Paśla vypłaty štrafu jany buduć departavanyja ź Biełarusi. Kožnamu ź ich zabaronieny ŭjezd u Biełaruś na 5 hadoŭ. Nahadajem, što ŭ suviazi sa źmianieńniem zakanadaŭstva ab dziaržaŭnaj miažy z 23 lipienia biahučaha hoda adkaznaść za parušeńnie miažy budzie bolš žorstkaj, štraf składzie ŭ miežach ad 10 da 100 bazavych vieličyń», — rastłumačyli ŭ pres-słužbie.
Z pačatku 2015 połackimi pahraničnikami zatrymana 39 parušalnikaŭ miažy, bolšaść ź ich składajuć vychadcy z Vjetnama i Hruzii
