Fiodar Lisica, fota Siarhieja Hudzilina.

Fiodar Lisica, fota Siarhieja Hudzilina.

Fiodar Lisica, były pieršy namieśnik ministra lasnoj haspadarki, praviadzie ŭ kałonii ŭzmocnienaha režymu 5 hadoŭ. U jaho kanfiskujuć majomaść. Jon pavinien spłacić 1 134 754 400 rubloŭ naniesienaj škody navakolnamu asiarodździu i 56 737 700 rubloŭ dziaržpošliny. Lisicu taksama zabaroniena zajmać pasady, źviazanyja z arhanizacyjna-rasparadčymi abaviazkami, na 5 hadoŭ.

Jaho pryznali vinavatym u niezakonnym budaŭnictvie katedža ŭ Salihorskim rajonie i šerahu niezakonnych rašeńniaŭ na pasadzie dyrektara Starobinskaha lashasa. Dva epizody tyčylisia pracy niepasredna ŭ ministerstvie.

Kryminalnuju spravu suprać Lisicy zaviali 9 krasavika 2014. Za paru dzion da hetaha źniali z pasady. Padstavaj stali vyniki pravierki, jakuju pravodzili KDB, MUS i KDK. Čynoŭnika abvinavacili ŭ złoŭžyvańni ŭładaj i słužbovymi paŭnamoctvami. Pavodle śledstva, Lisica niezakonna nabyŭ ziamielny ŭčastak, pabudavaŭ i pryvatyzavaŭ žyły dom, niametava vykarystoŭvaŭ biudžetnyja srodki.

Kala vioski Jaskavičy Salihorskaha rajona jon pabudavaŭ katedž na 294 m2. Ale akazałasia, što ziamla taja znachodzicca ŭ vodaachoŭnaj zonie i adnosicca da lasnoha fondu. I budavacca na joj było nielha. Užo ŭ 2005, kali Lisica byŭ dyrektaram Starobinskaha lashasa, svoj učastak jon niezakonna vyvieŭ ź lasnoha fondu, kab lehalizavać. A dom zarehistravaŭ na žonku. Ciapier katedž naležyć užo byłoj žoncy Lisicy i znachodzicca pad aryštam. Kali ciaham miesiaca vializnaja suma rodnymi byłoha čynoŭnika nie budzie spłačana, to hety katedž kanfiskujuć u prybytak dziaržavy.

Jašče adzin epizod tyčyŭsia druhoha katedža ŭ v. Tyčyny. U 2005—2010, pa viersii abvinavačańnia, Lisica daŭ zahad vydzielić učastak pad budaŭnictva viedamasnaha žytła. Adnak paśla budaŭnictva doma jaho nie ŭviali ŭ ekspłuatacyju jak słužbovaje žytło, kab možna było pryvatyzavać. Pryčym dom na 252 m2 pabudavaŭ lashas, jakim kiravaŭ Lisica. Dyrektar spačatku zasialiŭsia, a paśla staŭ u čarhu jak čałaviek, jaki maje pa trebu ŭ palapšeńni žyllovych umoŭ. I pryvatyzavaŭ dom. Ale jašče padčas suda prakuror admoviŭsia ad hetaha epizoda, paličyŭšy jaho zakonnym. Sudździa jaho padtrymaŭ — Lisica apraŭdany.

Kali Lisicu pieraviali ŭ Minsk, u 2010, jon paprasiŭ u ministra lasnoj haspadarki vydzialić słužbovaje žytło. Jamu prapanavali dvuchuzroŭnievuju kvateru ŭ Ždanovičach (111 m2 ). Za košt inavacyjnaha fondu zrabili ramont, abstavili meblaj. I tady Fiodar Lisica źviarnuŭsia z prośbaj dazvolić pryvatyzavać žytło jak asobie, jakaja maje patrebu ŭ palapšeńni žyllovych umoŭ. Ale vyjaviłasia, što ramantavać kvateru za srodki inviestfondu niezakonna. A takoje rasparadžeńnie, pavodle suda, addavaŭ sam Lisica.

Byłoha namieśnika ministra taksama abvinavacili ŭ tym, što ŭ 2012, pakul išoŭ ramont kvatery ŭ Ždanovičach, pražyvaŭ u numary «luks» viedamasnaj haścinicy biez apłaty.

Fiodar Lisica ŭsie abvinavačańni adkinuŭ. Jaho baraniŭ navat ministr lasnoj haspadarki Michaił Amieljanovič, jaki prachodziŭ pa spravie śviedkam.

«Najprystojniejšy čałaviek i kiraŭnik», — acharaktaryzavaŭ byłoha padnačalenaha ministr.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?