Amierykanski kampazitar Džejms Chornier, jaki atrymaŭ dźvie premii «Oskar» za muzyku da filma «Tytanik», zahinuŭ u avijacyjnaj katastrofie ŭ Kalifornii.
Pavodle dadzienych The Sydney Morning Herald, u samalocie S312 Tucano, jaki raźbiŭsia ŭ akruzie Vientura, znachodziŭsia tolki adzin čałaviek.
Čynoŭniki avijacyjnaha viedamstva ZŠA pakul nie zmahli paćvierdzić asobu zahinułaha ŭ avaryi piłota.
Ale hibiel 61-hadovaha Chorniera paćvierdziła jaho pamočnik Silvija Patrycyja.
«My zhubili dziŭnaha čałavieka ź vializnym sercam i nievierahodnym talentam. Jon pamior, robiačy toje, što jon lubiŭ. Dziakuj usim vam za vašu padtrymku i luboŭ», — skazała jana.
***
U 1998 hodzie za pracu nad filmam «Tytanik» Chornier atrymaŭ premiju «Oskar» u dźviuch naminacyjach: «Najlepšaja muzyka da dramatyčnaha filma» i «Najlepšaja pieśnia da filma» sumiesna z Uiłam Dženinhsam, jaki napisaŭ tekst pieśni My Heart Will Go On, vykananaj Selin Dyjon. Albom z saŭndtrekam da filma, vypuščany kampanijaj Sony Classical 18 listapada 1997 h., razyšoŭsia pa ŭsim śviecie 27 młn kopijami.
Inšyja viadomyja kinastužki, nad jakimi pracavaŭ Chornier, — «Kaśpier», «Džumandžy», «Advažnaje serca», «Dvuchsothadovy čałaviek», «Troja», «Maska Zora» i «Novy Čałaviek-pavuk». Kampazitar časta vykarystoŭvaŭ u svajoj muzycy elektronnyja i charavyja elemienty, a taksama kielckija matyvy.
