Hrecyja prezientavała novyja prapanovy dla kredytoraŭ padčas pazačarhovaha samitu kiraŭnikoŭ dziaržaŭ i ŭradaŭ krain ES, adnak kančatkovaha rašeńnia pakul dasiahnuć nie ŭdałosia i krainie ŭsio jašče pahražaje defołt.
Pra heta paviedamlaje Reuters.
Kiraŭniki jeŭrazony nazvali prapanovy Hrecyi asnovaj dla mahčymaj damovy, jakaja dazvolić razbłakavać finansavuju dapamohu i praduchilić defołt.
Staršynia Jeŭrapiejskaj rady Donald Tusk nazvaŭ hrečaskija prapanovy «pazityŭnym krokam napierad». Pavodle jaho słoŭ, ministry finansaŭ Jeŭrahrupy majuć zaćvierdzić pakiet reformaŭ dla Hrecyi ŭ sieradu ŭviečary i dasłać jaho lidaram krain dla kančatkovaha zaćviardžeńnia ŭ čaćvier ranicaj.
Tym nie mienš, nieabchodna spačatku ŭzhadnić prahramu reformaŭ z pradstaŭnikami jeŭrapiejskich uradaŭ, Jeŭrapiejskaha centralnaha banka i Mižnarodnaha valutnaha fondu.
«Ja pierakanany, što my pryjdziem da kančatkovaha pahadnieńnia na praciahu hetaha tydnia», — skazaŭ prezident Jeŭrakamisii Žan-Kłod Junkier paśla samitu.
Kanclerka Niamieččyny Anhieła Mierkiel — Hiermanija pazyčyła dla ŭratavańnia Hrecyi najbolš hrošaj — była aściarožnaju. «Ja nie mahu dać nijakich harantyj, što heta adbudziecca. Tam jašče šmat čaho treba zrabić», — skazała jana.
