20-21 červienia adbylisia ŭračystaści ŭ sanktuaryi Maci Božaj u Nievihiesie (Hiermanija). Śviatary z Tavarystva Chrysta dla palakaŭ-emihrantaŭ tradycyjna ŭ treciuju subotu i niadzielu červienia zaprašajuć da ŭdziełu ŭ hetych uračystaściach u «viestfalskuju Čenstachovu» palakaŭ i šanavalnikaŭ Panny Maryi.
Chrystusoŭcy nadajuć šmat uvahi tamu, kab achapić dušpastyrskaj apiekaj palakaŭ, jakija žyvuć za miežami svajoj krainy.
Padčas sioletnich uračystaściaŭ u Hod kansekravanaha žyćcia asabliva malilisia za ŭsich kansekravanych asobaŭ, jakija pryśviacili žyćcio Bohu i Kaściołu. Taksama praz zastupnictva Maryi Karalevy miru malilisia ab novych i šmatlikich śviatarskich, zakonnych i misijnych paklikańniach da słužeńnia ŭ Chrystovym Kaściole.
Asablivym pilihrymam, jaki naviedaŭ Hiermaniju ŭ 1978 h., byŭ tahačasny kardynał Karal Vajtyła, jaki, nakiroŭvajučysia ŭ Rym pierad kankłavam, pakinuŭ palakam, jakija pražyvajuć u Hiermanii, abraz Maci Božaj Čenstachoŭskaj jak znak svajoj prysutnaści i malitvy za palakaŭ. Paźniej jak Papa jon vučyŭ poŭnamu davieru siabie Bohu praz Maryju: TOTUS TUUS, abo ŭvieś Tvoj.
Sioletnija ŭračystaści ŭ Nievihiesie ŭznačaliŭ biskup Hrodzienski Alaksandr Kaškievič, jaki prybyŭ, kab umacavać u viery i dadać mocy ŭ niasieńni štodzionnych žyćciovych abaviazkaŭ.
Biełaruski ijerarch uznačaliŭ uračystuju Imšu z udziełam šmatlikich pilihrymaŭ, jakija prybyli ŭ sanktuaryj u šaści piešych pilihrymkach viečaram 20 červienia.
Źviartajučysia da pilihrymaŭ, biskup zaachvociŭ, kab kožny ź ich pastaraŭsia adkazać sabie na pytańnie: «Chto najvažniejšy ŭ maim žyćci?»
«Tolki tady, kali čałaviek pryznaje, što Boh jość Panam, što Jon pieršy i najvažniejšy, — tolki tady padychod da materyjalnych rečaŭ i roznych časovych kłopataŭ budzie pravilnym», — dadaŭ ijerarch.
21 červienia ŭ tym ža miescy biskup Hrodzienski ŭznačaliŭ Imšu dla pilihrymaŭ, jakija prybyli roznymi transpartnymi srodkami. U Eŭcharystyi ŭdzielničaŭ taksama hienieralny nastajaciel Tavarystva Chrysta dla palakaŭ-emihrantaŭ ks. Ryšard Hłavacki.
«U hetym śviatym miescy, aśviečanym malitvami tysiač pilihrymaŭ, prosim Maryju, Maci Boha i našu, jakaja źjaŭlajecca najdaskanalejšym uzoram biaźmiežnaha davieru, ab łascy prostaj, davierlivaj, dziciačaj viery», — skazaŭ u hamilii biskup Alaksandr Kaškievič.
Ijerarch zaachvociŭ da poŭnaha davieru Bohu, ad jakoha ŭsio pachodzić. «Kab my nikoli nie padumali, što siarod žyćciovych bur my pakinuty tolki na siabie. Kab, prychodziačy da Jezusa, my mieli adkrytaje serca i ź Jezusam – tolki ź Im – šukali samych pravilnych i najlepšych vyrašeńniaŭ», — skazaŭ biskup.
Taksama ijerarch ad imia biełaruskaha jepiskapatu padziakavaŭ za try hady słužeńnia ŭ Biełarusi ks. Edmundu Druzu, siońniašniamu pravincyjału niamiecka-hałandska-italjanska-vienhierskaj pravincyi, jaki z kastryčnika 2011 h. da žniŭnia 2014 h. vykonvaŭ funkcyju dyrektara Dušpastyrskaha centra pry Kanfierencyi Katalickich Biskupaŭ u Biełarusi ŭ Minsku.
Uračystaści ŭ Nievihiesie zaviaršylisia ružancovaj pracesijaj i śpievam piesień u honar Maci Božaj pry palavym ałtary na Hary Maryi. Ksiondz Ryšard Hłavacki, hienieralny nastajaciel chrystusoŭcaŭ, padziakavaŭ usim za tryvańnie ŭ viery i zaachvociŭ praciahvać katalickija tradycyi ŭ siabie doma i na pracy.