Siońnia Alaksandr Łukašenka pryznačyŭ Stanisłava Zasia vykonvajučym abaviazki dziaržsakratara Rady biaśpieki.
Pieraskočyŭ praź pieršaha namieśnika
Fota haziety «Vo słavu Rodiny».
Stanisłavu Zasiu 51 hod. Hienierał-major. Jon naradziŭsia ŭ Čarnihaŭskaj vobłaści Ukrainy. U 1985 hodzie skončyŭ Bakinskaje vyšejšaje ahulnavajskovaje kamandnaje vučylišča, u 1996 z załatym miedalom — Vajskovuju akademiju Biełarusi, a ŭ 2005 taksama załatym miedalom — Vajskovuju akademiju Hienieralnaha štaba Rasii. Kandydat vajskovych navuk.
Prachodziŭ słužbu i pracavaŭ va Uzbrojenych Siłach, MUS, KDB, Pamiežnych vojskach. Byŭ načalnikam adździeła vajskovaha budaŭnictva hałoŭnaha apieratyŭnaha ŭpraŭleńnia Hienieralnaha štaba Uzbrojenych sił Biełarusi. Ad 2008 hoda pracavaŭ namieśnikam Dziaržaŭnaha sakratara Rady Biaśpieki.
Darečy, cikava, što ŭ Radzie biaśpieki tradycyjna pryznačajuć namieśnikaŭ z roznych viedamstvaŭ — Minabarony, KDB i MUS. Zaś reprezientavaŭ jakraz armiejskaje viedamstva.
Admietna, što pieršym namieśnikam dziaržsakratara Rady biaśpieki źjaŭlajecca były kiraŭnik słužby achovy Łukašenki Andrej Uciuryn, ale vybar kiraŭnika dziaržavy paŭ nie na jaho. Cikava, ci Zaś — heta časovaja fihura, albo nadoŭha.
Zaścierahaŭ ad amierykanskaha ładu žyćcia
Fota motorace.by.
Letaś Stanisłaŭ Zaś apublikavaŭ u časopisie «Biełaruskaja dumka» prahramny artykuł «Supraćstajańnie ŭ śfiery sensaŭ u hłabalnym kantekście XXI stahodździa».
Aŭtar ličyć, što ŭ «rakietnaj-jadziernaj» śfiery śviet źjaŭlajecca bipalarnym — ZŠA i Rasija. U śfiery ekanomiki jość niekalki centraŭ – ZŠA, ES, Japonija, Kitaj. A voś u infarmacyjnaj śfiery «śviet usio bolš nabyvaje rysy adnapalarnaha z sprobami naviazać krainam zachodniuju (amierykanskuju) kulturu, maral, ład žyćcia».
«Rakietna-jadziernaj vajny ŭ ahladnaj budučyni nie budzie, jana iracyjanalnaja. Ale sproby apuskańnia cełych rehijonaŭ u postcyvilizacyjny chaos, raźviazvańnia vojnaŭ i kanfliktaŭ, jakija majuć na mecie poŭnuju dziaržaŭnuju anihilacyju, — hetyja sproby abaviazkova buduć naroščvacca. Pryčym abaviazkovym spadarožnikam dadzienych vojnaŭ źjaŭlajucca «kalarovyja» revalucyi, u asnovie jakich lažyć hłybokaja transfarmacyja śviadomaści ludziej, pa sutnaści jaho razbureńnie, padmiena fundamientalnych kaštoŭnaściaŭ ich surahatami i iłžyvymi idejami i sensami», — voś takija dumki ŭ hałavie ŭ v.a. dziaržsakratara Rady biaśpieki.
Darečy, varta źviarnuć uvahu na ilustracyjnaje azdableńnie hetaha materyjała ŭ časopisie «Biełaruskaja dumka», dzie ŭ adzin šerah pastaŭlenyja Juhasłavija, Siryja, Livija i… rodnaja Zasiu Ukraina.
Pastaviŭ u adzin šerah Anatola Tarasa i «Sputnik i pahrom»
Fota z haziety «Mijorskija naviny».
Stanisłaŭ Zaś pryśviaciŭ detalny razbor kniham papularyzatara biełaruskaj historyi Anatola Tarasa. Na dumku čynoŭnika, jany nie vytrymlivajuć nijakaj krytyki. Zaś naŭprost abvinavačvaje Tarasa ŭ «nianaviści da biełaruskaha naroda», a taksama ŭ «hieraizacyi nacysckich złačyncaŭ». Zaś paprakaje Tarasa tym, što jahony baćka pracavaŭ u Biełaruskim štabie partyzanskaha ruchu, «a syn publična nazyvaje partyzanaŭ złačyncami».
Zrešty, Stanisłaŭ Zaś pryznaje, što kožny maje prava na svaje pohlady. A abaviazak dziaržavy — abaranić historyju i kulturu. Jak prykład udałaha supraćstajańnia manipulacyjam čynoŭnik pryvodzić publikacyju Vadzima Hihina «Kazki Krapivienskaha pola», jakaja pakazvaje «štučnuju isteryju vakoł bitvy 500-hadovaj daŭniny pad Oršaj».
Zrešty, na arechi dastałosia nie tolki Tarasu, ale i šavinistyčnym rasijskim sajtam nakštałt «Sputnika i pahroma». Na dumku Zasia, Tarasa i «Sputnik i pahrom» abjadnoŭvaje «hienieravańnie nianaviści da kiraŭnictva krainy i asabista da kiraŭnika dziaržavy».
Časta jeździŭ u Ńju-Jork
Fota mininform.gov.by.
Stanisłaŭ Zaś nieadnarazova ŭdzielničaŭ i ŭznačalvaŭ biełaruskuju delehacyju padčas kanfierencyj kiraŭnikoŭ abaronnych viedamstvaŭ pad ehidaj AAN, štab-kvatera jakoj znachodzicca ŭ łohavie «amierykanskaj marali». Naprykład, mienavita Zaś kuryravaŭ pytańnie dasyłańnia biełaruskich miratvorcaŭ (miedykaŭ i aficeraŭ) u Livan.
Cikava taksama, što pracujučy ŭ Radzie biaśpieki Stanisłaŭ Zaś adnačasova ŭznačalvaŭ Dziaržaŭnuju kamisiju pa radyjočastotach. «Radyjočastotny śpiektr — heta nacyjanalny skarb», — kazaŭ Zaś. Jak viadoma, u Biełarusi niama niezaležnych radyjostancyj.
Rabiŭ kamplimienty Łukašenku
Fota gosinspekciya.gov.by.
«Kali ŭ našych aficeraŭ budzie fizičnaja padrychtoŭka na takim ža ŭzroŭni, jak u hałoŭnakamandujučaha, to heta budzie vielmi dobra. Zdarovy ład žyćcia, jaki demanstruje naš prezident, viadoma, znachodzić pavahu ŭ aficeraŭ i moža być pradmietam pierajmańnia», — skazaŭ Zaś u intervju telekanału «Biełaruś-1» u krasaviku sioleta.
