Palicejski šokier u formie pistaleta. Fota z sajta policestateusa.com
Mer miastečka Van Mieter (štat Ajova, ZŠA) Džejk Andersan i staršynia haradskoj rady Bob Łejsi pahadzilisia stać achviarami strełu z elektrašokiera dziela pakupki novaha aŭto dla palicyi, piša The Des Moines Register. Strelić daduć 18 lipienia padčas tancavalnaj viečaryny pažarnaha departamientu miastečka.
Taho, chto zmoža strelić u čynoŭnikaŭ, abiaruć z dapamohaj łatarei. Adzin łatarejny kvitok kaštuje 5 dalaraŭ, nabyvać možna nieabmiežavanuju kolkaść kvitkoŭ. Chto mienavita stanie achviaraj, mer ci staršynia rady, — abiaruć na narodnym hałasavańni.
Streł z palicejskaha šokiera zvyčajna nie niasie škody zdaroŭju i moža zabić chiba chvoraha na serca pry trapleńni naŭprost u serca. «Mnohija aficery vam skažuć, što chutčej pahadzilisia by na elektrašok, čym na piarcovy bałončyk. Efiekt niadoŭhi, nie piače», — patłumačyŭ Bił Dahart, miascovy aficer palicyi, jaki sam nikoli nie byŭ mišeńniu palicejskaha šokiera.
Hrošy, sabranyja na łatarei, płanujecca puścić na patreby palicyi, jakoj treba nabyć druhuju mašynu, darožny radar, a taksama rasšyryć štat časovych supracoŭnikaŭ i reziervistaŭ, jaki na siońnia naličvaje šeść čałaviek. Taksama haradskaja palicyja źbirajecca nabyć bolš nieletalnych elektrašokieraŭ.
Śćviardžajecca, što ideja pryjšła padčas abmierkavańnia biudžetu palicyi, a mer i staršynia rady pahadzilisia na elektrašok dabraachvotna. U abodvuch raniej nie stralali z palicejskaha šokiera.
Patreba ŭ dadatkovych hrošach nie vyklikanaja rostam złačynnaści miastečka z nasielnictvam u 1100 čałaviek. Van Mieter źbirajecca pryvabić kampanii kštałtu Microsoft ci Facebook da raźmiaščeńnia data-centraŭ, a takija kampanii majuć peŭnyja patrabavańni da palicyi i pažarnych słužbaŭ.
