Ministerstva finansaŭ Biełarusi apublikavała finansavyja spravazdačy adkrytych akcyjaniernych tavarystvaŭ krainy za pieršy kvartał 2015 hod. Heta kala 2250 kampanij.
Aproč ich, pra svaje straty i prybytki paviedamili kala 200 kampanij, jakija vypuskali na rynak svaje ablihacyi.
Narešcie, Nacbank apublikavaŭ spravazdačy troch dziasiatkaŭ bankaŭ krainy.
Na padstavie źviestak pra finansavy stan amal 2500 kampanij «Naša Niva» skłała tradycyjny top-20 samych prybytkovych i stratnych kampanij z adkrytaj spravazdačnaściu.
Dla zručnaści ŭsprymańnia ličbaŭ sumy pieraviedzienyja ŭ dalary pa siarednim kvartalnym kursie ($1=BYR14786,17).
| Kampanija | Prybytak |
| 1. Biełaruśkalij | 196,1 |
| 2. Hazprom transhaz Biełaruś | 111,0 |
| 3. Mazyrski NPZ | 94,2 |
| 4. BMZ | 30,1 |
| 5. Bank raźvićcia | 27,1 |
| 6. Biełhazprombank | 19,8 |
| 7. Viciebskenierha | 18,8 |
| 8. Biełarusbank | 16,9 |
| 9. Pinski KCHP | 16,8 |
| 10. Hrodna Azot | 15,3 |
| 11. Pryjorbank | 14,7 |
| 12. Homielenierha | 12,4 |
| 13. Biełaruskaja čyhunka | 11,5 |
| 14. Homieltransnafta Družba | 11,1 |
| 15. Jeŭrahandal | 8,7 |
| 16. 558 Avijacyjny ramontny zavod | 8,6 |
| 17. Biełaruskaja kalijnaja kampanija | 7,4 |
| 18. Bank BiełVEB | 6,8 |
| 19. Biełahraprambank | 6,7 |
| 20. Słucki cukrovarafinadny kambinat | 5,8 |
Ličby ŭkazanyja ŭ miljonach dalaraŭ.
Pieršaje, što kidajecca ŭ vočy pry analizie spravazdač – abvalnaje padzieńnie prybytkaŭ u kampanij. Zvyčajna «prachadny bał» dla taho, kab trapić u top-20 samych paśpiachovych pradpryjemstvaŭ za kvartał, składaje kala $20 miljonaŭ. Ciapier ža hetaja ličba apuściłasia nižej za $6 miljonaŭ.
Fłahmanam ekanomiki zastajecca «Biełaruśkalij», jaki zarabiŭ čystymi $196 miljonaŭ. Mazyrski naftapierapracoŭčy zavod tradycyjna zajmaje vierchnija pazicyi. Ciapier jon zastaŭsia na trecim miescy, prapuściŭšy napierad «Hazprom transhaz Biełaruś» (były «Biełtranshaz». Abiedźvie kampanii prynieśli pryblizna pa $100 miljonaŭ.
Inšyja pradpryjemstvy zastalisia daloka zzadu. Naprykład, inšaja naftapierapracoŭka, «Naftan», zarabiła za kvartał usiaho $3,7 miljona i ŭ top-20 nie patrapiła.
Siarod bankaŭ najlepšyja vyniki prademanstravaŭ «Biełhazprombank» – $19,8 miljona. Letaś padkantrolnaja «Hazpromu» struktura była siarod bankaŭ piataj pa prybytkovaści.
A voś ciapier udałosia abyści tradycyjnaha lidara – dziaržaŭny «Biełarusbank» ($16,9 miljona). Niepadaloku i pryvatny «Pryjorbank» ($14,7 miljona). Astatnija banki istotna adstali.
Hałoŭnaja niespadziavanka – vysokaja pazicyja Pinskaha kambinata chlebapraduktaŭ ($16,8 miljona).
Z pryvatnych pradpryjemstvaŭ marku trymaje «Jeŭrahandal» (sietka «Jeŭraopt»), jaki zarabiŭ $8,7 miljona. Adnak u paraŭnańni ź letašnimi ličbami heta zamała.
Što da stratnych kampanij, to ich naličyłasia siem sotniaŭ.
| Kampanija | Straty |
| 1. Brestenierha | 73,4 |
| 2. Delta Bank | 40,7 |
| 3. MAZ | 25,6 |
| 4. Homsielmaš | 19,5 |
| 5. MTZ | 16,0 |
| 6. Minskenierha | 15,8 |
| 7. Biełavija | 9,0 |
| 8. Śvietłahorski CKK | 6,2 |
| 9. Krasnasielskbudmateryjały | 5,4 |
| 10. Homielškło | 4,8 |
Ličby ŭkazanyja ŭ miljonach dalaraŭ.
Na dnie niečakana apynułasia «Brestenierha» – -73,4 miljona! Straty atrymanyja za košt inviestycyjnaj dziejnaści.
Niepadaloku znachodzicca patanuły «Delta Bank». U siaredzinie sakavika va ŭkrainskuju finansavuju ŭstanovu była ŭviedzienaja źniešniaja administracyja. Nie dziŭna, kali ŭličyć -$40,7 miljona čystych strataŭ, atrymanych za pieršy kvartał. U vyniku «Delta Bank» zbankrutavaŭ.
A voś pramysłovyja hihanty – MAZ i MTZ – užo daŭno prapisalisia ŭ šerahach samych stratnych pradpryjemstvaŭ.
* * *
«Biełaruśkalij», «Trajpł», banki — top-20 samych prybytkovych kampanij krainy za 2014 hod
