U minskich mikrarajonach Kamiennaja Horka i Brylevičy płanujecca pabudavać tralejbusnyja linii, paviedamiŭ na pres-kanfierencyi 1 lipienia načalnik adździeła arhanizacyi pasažyrskich pieravozak dziaržaŭnaj ustanovy «Staličny transpart i suviaź» Alaksandr Kapciuch.
Pavodle jaho słoŭ, «raźvićciu haradskoha elektryčnaha transpartu z kožnym hodam nadajecca ŭsio bolš uvahi, uličvajučy budaŭnictva Biełaruskaj AES i ekałohiju».
Čynoŭnik paviedamiŭ, što siońnia prajektujucca tralejbusnyja šlachi ŭ mikrarajonach Kamiennaja Horka i Brylevičy. «Sioleta realizacyi takoha maštabnaha prajekta nie praduhledžana, viaducca tolki prajektnyja raboty», — skazaŭ Kapciuch. Linii buduć budavać u 2016—2017 hadach.
Śpiecyjalist taksama paviedamiŭ, što pryniataje rašeńnie ab skasavańni dahavora ź inviestaram, jaki abiacaŭ pabudavać tralejbusnaje depo ŭ mikrarajonie Uručča. «Horad depo zabiraje, praviadzie minimalnyja budaŭničyja raboty i zdaść abjekt u ekspłuatacyju», — skazaŭ Kapciuch.
Jon adznačyŭ, što haradskimi ŭładami daŭno było pryniataje rašeńnie ab madernizacyi isnaj tramvajnaj infrastruktury.
«Biełkamunmaš» u stanie vypuskać vysokamabilny ruchomy skład, jaki moža i pavinien pracavać na jakasnych puciach. Nie madernizujučy ich, niemahčyma raźvićcio hetaha vidu transpartu. Siońnia ramantujucca puci na vulicy Kazłova, u płanach — Uljanaŭskaja, praśpiekt Mašerava (ad Kujbyšava da Čyrvonaj), razvarot na Źmitraka Biaduli», — paviedamiŭ śpiecyjalist. Pavodle jaho słoŭ, raboty viaducca pavodle sučasnych technałohij, i «zakryćcio tramvajnych puciej dla ramontu sydzie na hady».
