U Biełarusi nie było i nie budzie «nacyjanalistyčnych imknieńniaŭ», zajaviŭ žurnalistam ministr zamiežnych spraŭ Uładzimir Makiej, pad staršynstvam jakoha 1 lipienia pry MZS adbyłosia pieršaje pasiadžeńnie Kansultatyŭnaha savieta pa spravach biełarusaŭ zamiežža.

«U Biełarusi nikoli nie było i nie budzie ŭ najnoŭšaj historyi nacyjanalistyčnych imknieńniaŭ. Prezident nakont hetaha vykazvaŭsia šmat razoŭ», — skazaŭ Makiej. 

Pavodle jaho słoŭ, u krainie žyvuć pradstaŭniki bolš čym sta nacyjanalnaściej. «Navat adzin łaosiec, zhodna ź pierapisam nasielnictva, žyvie. I my nie chočam, kab niejkaja nacyja daminavała nad pradstaŭnikami astatnich nacyj i narodnaściej, jakija žyvuć u Biełarusi. Takoha nie było i nikoli nie budzie. Heta nie palityka biełaruskaha kiraŭnictva, nie palityka prezidenta Biełarusi. Tamu tut nacyjanalizmu nie budzie nikoli», — pieradaje słovy ministra pres-słužba MZS. 

Jak ličyć Makiej, nacyjanalizm «śpieje tolki ŭ rozumach nierazumnych ludziej, jakija, napeŭna, sprabujuć za miažoj ci dzieści jašče dasiahnuć, mahčyma, svaich niejkich palityčnych metaŭ». «My aryjentavany na toje i zacikaŭleny ŭ tym, kab u Biełarusi byŭ mižnacyjanalny i mižkanfiesijny mir, zhoda i spakoj. I my nie chočam, kab u Biełarusi adbyvalisia padziei, jakija adbyvajucca ŭ niekatorych inšych krainach. Za prykładami daloka chadzić nie treba», — dadaŭ jon.

Ministr paraiŭ supakoicca ŭsim, chto «vydumvaje štości pra rost nacyjanalizmu ŭ Biełarusi».

Makiej paviedamiŭ, što ŭ pasiadžeńni Kansultatyŭnaha savieta pa spravach biełarusaŭ zamiežža 1 lipienia ŭdzielničali 32 delehaty z 18 krain, a vynikam pracy stanie stvareńnie darožnaj karty, jakaja laža ŭ asnovu padrychtoŭki prahramy «Biełarusy zamiežža» na 2016—2020 hady.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?