Pry kožnym ŭjeździe ŭ krainy Šenhiena ŭ biełarusaŭ ź bijamietryčnymi vizami pravierać adbitki palcaŭ. Pra heta TUT.BY paviedamili ŭ Nacyjanalnym kaardynacyjnym centry pamiežnaj słužby Łatvii.
Novaja pracedura pravierki źviestak na miažy datyčycca ŭsich, chto padavaŭ dakumienty na šenhienskuju vizu paśla 23 červienia, i pry hetym zdavaŭ bijamietryju. Heta abaviazkovaja ŭmova ŭjezdu ŭ krainy Šenhienskaha pahadnieńnia niezaležna ad vidu transpartu, na jakim jedzie biełarus.
Dla tych, chto atrymaŭ vizu da ŭviadzieńnia bijamietryčnaha zboru dadzienych, pracedura pierasiačeńnia miažy nie źmianiłasia.
Hiedrus Myžucis, kiraŭnik adździeła pa suviaziach z hramadskaściu słužby achovy dziaržaŭnaj miažy MUS Litvy, raspavioŭ, što ŭ ich prapusknych punktach taksama źjaviłasia techničnaja mahčymaść dla pravierki bijamietryčnych viz. Da dadatkovych čerhaŭ na miažy navina nie pryviała. Za siońniašniuju źmienu mižnarodny aŭtadarožny punkt propusku «Miadzininkaj — Kamienny Łoh» ź bijamietryčnaj vizaj pierasiok ŭsiaho adzin biełarus.
Jak paviedamili ŭ pradstaŭnictvie ES u Biełarusi, krainy-ŭdzielnicy Šenhienskaha pahadnieńnia ŭ abaviazkovym paradku źviarajuć na pamiežnych pierachodach adbitki palcaŭ hramadzian trecich krain, jakija ŭjazdžajuć pa bijamietryčnych vizach, z kastryčnika 2014 hoda.
Adnačasova Šenhienski kodeks ab miežach dazvalaje adstupać ad hetaha patrabavańnia i spraŭdžvać adbitki vybaračna, kali patok ludziej, jakija pierasiakajuć miažu, dasiahaje takoj intensiŭnaści, što čas čakańnia na pamiežnych pierachodach pavialičvajecca.
Nahadajem, što krainy Šenhienskaha pahadnieńnia ŭviali bijamietryčnyja vizy dla biełarusaŭ z 23 červienia 2015 hoda. Heta značyć, što padavać dakumienty ŭ konsulstva i vizavyja centry treba asabista i pry hetym zdavać adbitki palcaŭ. Fatahrafiju zajaŭnika skanujuć.
