Dziaržaŭny archiŭ Rasijskaj Fiederacyi apublikavaŭ na svaim sajcie daviedku-dakład hałoŭnaha vajennaha prakurora N. Afanaśjeva «Ab 28 panfiłaŭcach» ad 10 maja 1948 hoda.
U dakumiencie śćviardžajecca, što podźvih 316-j strałkovaj dyvizii pad kamandavańniem hienierała Ivana Panfiłava, jaki staŭ lehiendaj, na samaj spravie byŭ vydumkaj vajennych karespandentaŭ. Zhodna z dakładam, jak minimum piaciora bajcoŭ, jakija «hieraična zahinuli», nasamreč vyžyli, a adzin ź ich uvohule sam zdaŭsia ŭ niamiecki pałon i dobraachvotna słužyŭ palicajem.
Nahadajem, što «kananičnaja» viersija podźvihu takaja: 16 listapada 1941 hoda, kali pačałosia novaje nastupleńnie praciŭnika na Maskvu, bajcy 4-j roty na čale z palitrukom Kłačkovym, ažyćciaŭlajučy abaronu ŭ rajonie raźjezda Dubasiekava, što pobač z Vałakałamskam, u chodzie 4-hadzinnaha boju źniščyli 18 varožych tankaŭ. Usie 28 čałaviek zahinuli, nichto nie zdaŭsia (dakładniej, adzin pasprabavaŭ, ale jaho zastrelili sami «panfiłaŭcy»). Fraza «Vialikaja Rasija, a adstupać niama kudy — za nami Maskva!», jakuju nibyta vymaviŭ pierad śmierciu palitruk Kłačkoŭ, była ŭklučana ŭ savieckija školnyja i ŭniviersiteckija padručniki pa historyi.
Pomnik panfiłaŭcam u Kazachstanie, fota 4dekor.blogspot.com
Dakład vajennaha prakurora abviarhaje lehiendu. U im havorycca, što ŭpieršyniu «podźvih panfiłaŭcaŭ» źjaviŭsia ŭ narysie karespandenta haziety «Čyrvonaja Źviazda» Karaciejeva. Hety narys vyjšaŭ 27 listapada 1941 hoda, ŭ im śćviardžałasia tolki, što ŭsie bajcy zahinuli, nie prapuściŭšy voraha, biez padrabiaznaściej. A na nastupny dzień vyjšaŭ razhornuty materyjał litaraturnaha sakratara hetaj ža haziety Kryvickaha pad nazvaj «Zapaviet 28 panfiłaŭcaŭ», dzie i była taja viersija pra «panfiłaŭca-zdradnika», jaki vyrašyŭ zdacca.
Adnak i heta nie ŭsio. U studzieni 1942 hoda Kryvicki iznoŭ publikuje artykuł pra «panfiłaŭcaŭ». U im padrabiazna apisvajecca boj, hučać repliki «hierojaŭ», nazyvajucca ich imiony i proźviščy. Pry hetym, letam 1942 hoda ŭsie hvardziejcy, jakija fihuravali ŭ tekście, paśmiarotna atrymali zvańni hierojaŭ Savieckaha Sajuzu.
U rasśledavańni vajennaha prakurora śćviardžajecca, što ŭsie šmatlikija publikacyi, artykuły, navat vieršy, paemy i pieśni, pryśviečanyja «panfiłaŭcam», byli stvoranyja ci samim Kryvickim, ci pry jaho ŭdziele.
Šmatlikija pomniki panfiłaŭcam i pa siońniašni dzień stajać na ŭsioj postsavieckaj prastory, u ich honar nazvany vulicy (jość takija i ŭ Breście, i ŭ Žłobinie).
Proma-płakat da stužki «Dvaccać vosiem panfiłaŭcaŭ»
Cikava, što ŭ červieni u Rasii zaviaršyli zdymki filma «Dvaccać vosiem panfiłaŭcaŭ». Prajekt admietny tym, što, pa śćviardžeńni jaho aŭtaraŭ, im udałosia z dapamohaj kraŭdfandynhu sabrać na zdymki bolš za 33 miljonaŭ rubloŭ. Pradziusier filma Andrej Šaljopa tak prakamientavaŭ situacyju z tym, što histaryčny fakt, pra jaki jon źniaŭ film, akazaŭsia fejkam: «U lehiendarnych podźvihach, jakija stali častkaj kultury naroda, zachoŭvajecca maralny patencyjał. Heta toje, z čaho składajecca naša nacyjanalnaja samaśviadomaść. Heta tyja prostyja prykłady, jakija dazvalajuć nam vychoŭvać novyja pakaleńni. Čapać ich nielha. Heta śviatyni. Sprabavać raźvienčvać nacyjanalnyja podźvihi možna tolki dla taho, kab asłabić maralnyja apory naroda».
