Mižnarodnaja arhanizacyja «Małady front» (Čechija) skłała śpis «Čornaj sotni» ŭ Biełarusi — «hrupovak i źjaŭ «ruskaha śvietu», paviedamlaje pres-słužba arhanizacyi.
«Čornaja sotnia» — tak sto hadoŭ tamu zvali natoŭpy rasijskaj manarchičnaj černi, jakaja dziela abarony impieryi praz pahromy i hvałt raspraŭlałasia z čužyncami i inšaviercami. U toj čas, kali va Ukrainie paśla «Majdana» rasijskaja ahresija pierajšła ŭ adkrytuju vajennuju formu, u Biełarusi akupacyja ŭsio jašče praciahvajecca praź dziejnaść nieźličonych jak aficyjna zarehistravanych, tak i nielehalnych prarasijskich arhanizacyj», — rastłumačyli ŭ «Maładym froncie».
Arhanizacyja składała śpis praz svaich rehijanalnych aktyvistaŭ, abščyny chryścijanskich demakrataŭ i pry dapamozie infarmacyi ŭ internecie. «Hety śpis — tolki nakid abo kanśpiekt dla surjoznaj pracy pa jačejkach «ruskaha śvietu», — paviedamiła pres-słužba.
«Małady front» ličyć pieršačarhovaj zadačaj biełaruskaha hramadstva «supraćstajać dziejnaści čornasociennych kramloŭskich struktur, jakija zajmajucca adkrytaj i skrytaj padrychtoŭkaj zachopu Biełarusi Rasijaj». Arhanizacyja prapanoŭvaje «ŭsim nieabyjakavym patryjotam źviartacca ŭ prakuraturu i inšyja dziaržstruktury Biełarusi z patrabavańniem spynić dziejnaść toj ci inšaj arhanizacyi sa śpisu «Čornaj sotni».
Śpis «Čornaj sotni» raźmieščany na sajcie «Maładoha frontu». U jaho ŭklučanyja, naprykład, biełaruskaje pradstaŭnictva Rassupracoŭnictva (Fiederalnaha ahienctva RF pa spravach SND, suajčyńnikaŭ, jakija pražyvajuć za miažoj, i pa mižnarodnym humanitarnym supracoŭnictvie), infarmacyjna-analityčny partał «Impieryja», vajenna-patryjatyčny kłub «Kazacki ratunak», supolnaść «Antymajdan», mižnarodny ruch «Internacyjanalnaja Rasija» i inšyja.
