26 tamoŭ sieryi «Maja biełaruskaja kniha» vydaviectva «Papury» davieźli da knižnych kram i sietki OZ.BY. 7 lipienia adbyłasia prezientacyja biudžetnych knih u miakkaj vokładcy kišennaha farmatu koleru vady, ziamli, nieba i travy.

Sieryja ŭjaŭlaje saboj zrez biełaruskaj litaratury — ad staražytnych lehiend, narodnych kazak, chrestamatyjnych i małaviadomych tvoraŭ kłasikaŭ da rabot sučasnych piśmieńnikaŭ. Siarod aŭtaraŭ kłasiki biełaruskaj školnaj prahramy — Janka Kupała, Jakub Kołas, Maksim Harecki, Kuźma Čorny, Maksim Bahdanovič i Ivan Mielež. Jość i pradstaŭniki vajennaha pakaleńnia — Ivan Šamiakin, Aleś Adamovič, Vasil Bykaŭ, fiłałahičnaha pakaleńnia — Ryhor Baradulin, Uładzimir Karatkievič.

Składalniki ŭklučyli ŭ sieryju i biełaruskich aŭtaraŭ, jakija pisali nie na biełaruskaj movie: Majsieja Kulbaka, Adama Mickieviča. Pradstaŭlenyja taksama knihi, jakija vydavalisia raniej, ale ich užo nie tak prosta znajści ŭ kramach — heta tvory Andreja Mryja, Viačasłava Adamčyka, Sałamiei Pilštynovaj, Franciška Alachnoviča, Jana Barščeŭskaha.

U sieryi pradstaŭlenyja tvory na šyroki čytacki hust: dla amataraŭ histaryčnaj litaratury — Kastuś Tarasaŭ «Pahonia na Hrunvald», dla dziaciej — kazki «Siniaja śvita» i tvor «Paleskija Rabinzony» Janki Maŭra.

Pry hetym vydaviectva vykanała aŭtarskija pravy i supracoŭničała z naščadkami piśmieńnikaŭ.

«My vyrašyli vydać kłasiku na chvali cikavaści da biełaruskaj movy, — skazaŭ dyrektar vydaviectva. — Na ščaście, my znajomyja sa składalnikami, jakija stvaryli dobruju sieryju, što adpaviadaje patrebam čytačoŭ. Dla nas heta svojeasablivy ekśpierymient — ci buduć karystacca popytam takija knihi. Kali sieryja pradasca, my hatovyja vydać inšych aŭtaraŭ i pavialičyć tyražy ciapierašnich vydańniaŭ. Ciapier razhladajem ideju vydać hetuju sieryju i ŭ ćviordaj vokładcy. Ad biblijatek i ludziej, jakija chacieli b padaryć sieryju siabram, užo pastupili takija prośby. Ale heta zrobić knihu daražejšaj, tamu my abdumvajem hety varyjant».

Sumarny tyraž knih — 60 tysiač asobnikaŭ, kožnaja kniha pa 2-2,5 tysiačy štuk.

Nad prajektam na praciahu dvuch hadoŭ pracavali historyk, paet, vice-prezident Biełaruskaha PEN-centra Uładzimir Arłoŭ, piśmieńnik i litaraturaznaŭca, kandydat fiłałahičnych navuk Piatro Vasiučenka, fiłołah i hramadski dziejač Lavon Barščeŭski, litaraturaznaŭca, piśmieńnik, doktar fiłałahičnych navuk Michaś Tyčyna i piśmieńnik, pierakładčyk, vydaviec Uładzimir Siŭčykaŭ.

Pa słovach składalnikaŭ, kožny ź ich skłaŭ piersanalny śpis 30 najlepšych biełaruskich knih, i potym usio vyniki supastavili. Tak i naradziłasia sieryja. Pryčym adzin z układalnikaŭ Uładzimir Arłoŭ doŭhija hady składaje ŭłasnuju «załatuju» palicu biełaruskaj kłasiki, kudy ŭvachodziać knihi, jakija jon pračytaŭ jašče ŭ junactvie. Pavodle jaho słoŭ, ciapierašniaja sieryja ciesna pieraklikajecca z adabranaj im chatniaj biblijatekaj.

Meta prajekta — zrabić ajčynnych piśmieńnikaŭ bližejšymi da biełarusaŭ, a čytačam dać šaniec znoŭku pračytać i acanić tvory, pradstaŭlenyja siaredniaj škołaj nie ŭ poŭnym abjomie, a časam «projdzienyja» tolki farmalna.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?