Kiroŭca, pa viersii rodnych, mahła nie ŭbačyć kartež z-za pyłu. Jeŭraradyjo rekanstrujuje momant zdareńnia i vyśviatlaje, ź jakoj chutkaściu jechała śpiecmašyna.
U čaćvier 9 lipienia vyrašycca pytańnie nakont miery strymańnia dla 23-hadovaj Hanny V., jakaja 5 lipienia sutyknułasia z kartežam śpiecmašyn. A pakul ź dziaŭčynaj nie mohuć parazmaŭlać ni jaje mama, ni siostry, ni 4-hadovy syn Illa. U balnicy ŭ jaje kanfiskavali mabilny telefon.
Nahadajem, što avaryja zdaryłasia ŭviečary pad vioskaj Aleksandryja. Zdareńnie stała rezanansnym, bo, pavodle niepaćvierdžanaj infarmacyi, Hanna V. sutyknułasia ź mikraaŭtobusam słužby achovy prezidenta. Dvoje supracoŭnikaŭ — u ciažkim stanie.
Dziaŭčyna jechała sa svajakami na voziera. Videarehistratar słužbovaha mikraaŭtobusa «Mersedes» zafiksavaŭ momant avaryi. Na videa bačna, što lehkavik vylecieŭ na sustrečnuju pałasu sapraŭdy raptoŭna. U vyniku sutyknieńnia nichto z pasažyraŭ «BMV» pa-sapraŭdnamu mocna nie paciarpieŭ. A voś mikraaŭtobus sa śpiecłužboŭcami niekalki razoŭ pierakuliŭsia.
Muž Hanny V.: «Prama ŭ pałacie jaje ŭziali pad aryšt na 72 hadziny»
Hanna V. žyvie ŭ Škłoŭskim rajonie, pracuje majstram na adnym z charčovych pradpryjemstvaŭ. Dziaŭčyna — śpiecyjalist u halinie miasa-małočnaj vytvorčaści. Voś-voś jana źbirałasia adznačać z mužam 5 hadoŭ sumiesnaha žyćcia.
Pravy Hanna atrymała mienš za dva hady tamu. Paśla sutyknieńnia ź mikraaŭtobusam jaje taksama dastavili ŭ balnicu.
«Žonka adčuvaje siabie dobra za vyklučeńniem taho, što jana pad aryštam. Byli ŭdary hrudnoj kletki i ŭdary ruk. Prama ŭ pałacie jaje ŭziali pad aryšt na 72 hadziny. U čaćvier 9-ha lipienia budzie vyrašacca, kudy jana trapić — u SIZA ci pad damašni aryšt», — dzielicca ź Jeŭraradyjo niebahataj infarmacyjaj muž Hanny V. Michaił. Uvaha z boku Śledčaha kamiteta takaja, što lišniaha jon pra zdareńnie kazać nie choča.
Maryja Ivanaŭna, maci Hanny V., zapłakała, kali zhadała pra zdareńnie pad Aleksandryjaj:
«Akazvajecca, u toj mašynie abodva ŭnuki maje byli, abodva ziaci, abiedźvie dački! Jak ich sobiła trapić u avaryju — nie razumieju. Dziakavać Bohu, što žyvyja, što jechali ź nizkaj chutkaściu i što mašyna nadziejnaja była».
Čamu «BMV» prataraniła mikraaŭtobus
Kali hladziš videa avaryi, uvohule niezrazumieła, z-za čaho lehkavik z Hannaj i jaje blizkimi vyjechaŭ na sustrečnuju pałasu. Ad krynicy, jakaja maje dačynieńnie da abstavinaŭ avaryi, Jeŭraradyjo daviedałasia pra toje, što pasažyry «BMV»patłumačyli pravaachoŭnikam. Jany padzialilisia nazirańniami, što «kartež niośsia na vialikaj chutkaści». Z-za hetaha niuansu i pyłu, padniataha piarednimi aŭtamabilami, svoječasova zaŭvažyć mikraaŭtobus Hanna nie zmahła. Kali ž zatarmaziła, adno z kołaŭ trapiła na piasok, i «BMV» zaniesła prama pad mikraaŭtobus.
«Nie mahu vam paviedamić usich padrabiaznaściaŭ avaryi, bo bajusia niešta pierakrucić. Viedaju tolki, što Hanna — dziaŭčynka akuratnaja, dyscyplinavanaja, adkaznaja. Da taho ž, u mašynie byli dzieci. Tamu čałaviečy faktar ź jaje boku — heta naŭrad ci. Miarkuju, heta mahło zdarycca z-za drennaj darohi i drennaha ahladu…» — ličyć Śviatłana, rodnaja siastra Hanny.
Ź jakoj chutkaściu ruchaŭsia kartež
Jeŭraradyjo vyvučyła trasu, na jakoj adbyłosia zdareńnie, i znajšło na huhł-kartach miesca avaryi ŭ 5 kiłamietrach ad Aleksandryi.
Za siekundy da sutyknieńnia kiroŭca «BMV» tolki-tolki pieraadoleła horku. I tut ža ŭbačyła pierad saboj spynienyja na abočynie aŭtamabili i kartež. Pa infarmacyi vidavočcaŭ, śpiecmašyny mahli jechać chutčej za dazvolenyja na toj darozie 90 km/h.
Punkt 25 hłavy 6 Praviłaŭ darožnaha ruchu dazvalaje kiroŭcam transpartnych srodkaŭ apieratyŭnaha pryznačeńnia pieravyšać chutkaść pry ŭmovie, što arhanizavanaja biaśpieka darožnaha ruchu, a na mašynie ŭklučanyja sinija ci sinija i čyrvonyja majački.
Sprabujem vyśvietlić, ź jakoj chutkaściu ŭsio ž ruchaŭsia mikraaŭtobus «Mersedes».
Padliki
Viadoma, što kartež jechaŭ z Aleksandryi ŭ bok Oršy pa trasie R-76. Kali my paraŭnali videa avaryi sa zdymkami trasy z kosmasu, atrymałasia znajści prybliznaje miesca zdareńnia. Na videa bačna, što źleva ad trasy raście niekalki dreŭ, sprava — «žoŭtaje» pole, dalej źleva — nievialički lasok i les daloka napieradzie. Taksama sprava bačym darožny znak.
Na ŭsioj trasie jość tolki adno padobnaje miesca. Na jašče adnym videa ź interneta, dzie źniaty kavałak hetaj trasy, taksama biez prablem i sumnievaŭ raspaznajem toje samaje miesca.
Ad pačatku zapisu, jaki apublikavaŭ Śledčy kamitet, da niepasrednaha sutyknieńnia mikraaŭtobus z kartežu prajechaŭ 7 adnolkavych biełych raździalalnych pałos. Zhodna z mapami Huhła, heta pryblizna 81 mietr.
Zapis videarehistratara «Mersedesa», apublikavany Śledčym kamitetam, zapavoleny, ale tam jość tajmkod. Zhodna ź im, realnaja siekunda na videa zajmaje 4 siekundy ŭ rečaisnaści. Na videa da sutyknieńnia prachodzić pryblizna 9 siekund, a heta značyć, što realna prajšło ŭsiaho 2,25 siekundy.
Mikraaŭtobus z kartežu za hetyja 2,25 siekundy prajechaŭ kala 81 mietra. Heta prybliznyja padliki, ale atrymlivajecca, što chutkaść «Mersedesa» mahła dasiahać 129,6 km/h.
Adznačym, što praz 170 mietraŭ ad miesca avaryi znachodzicca piešachodny pierachod, prypynak i skryžavańnie. Na chutkaści 130 km/h aŭtamabil prajazdžaje takuju adlehłaść usiaho za 5 siekund.
