Apelacyjny sud Kijeva paćvierdziŭ rašeńnie Piačerskaha rajonnaha suda ŭkrainskaj stalicy pra zatrymańnie vaśmi bajcoŭ roty specyjanalnaha pryznačeńnia «Tarnada» Nacyjanalnaj hvardyi Ŭkrainy, jakija abvinavačvajucca ŭ ciažkich złačynstvach na terytoryi praviadzieńnia Antyterarystyčnaj aperacyi ŭ Łuhanskaj vobłaści.

Pryčym adzin ź ich, Barys Hulčuk byŭ zatrymany jak hramadzianin Biełarusi, jaki nibyta pražyvaje ŭ Bieraści. Ale, jak vyjaviła «Svaboda», u kvatery pa ŭkazanym u sudovym rašeńni adrasie pra takoha chłopca nichto nia viedaje. [»Naša Niva» ŭžo paviedamlała pra toje, što Hulčuk nie maje nijakaha dačynieńnia da Biełarusi — Red.]. 

Vajskovaja prakuratura Ŭkrainy ŭ svaim pazovie na aryšt Barysa Hulčuka identyfikavała jaho jak biełarusa. Mienavita hetyja dadzienyja mieściacca ŭ aficyjnym dakumencie Piačerskaha rajonnaha sudu Kijevie.

«Barys naradziŭsia va Ŭkrainie i zaŭsiody byŭ hramadzianinam Ukrainy. My ŭsie z Uładzimir-Vałynskaha. Nie razumiejem, čamu prakuratura identyfikavała jaho jak hramadzianina Biełarusi i adkul heta ŭsio ŭziałosia. Jak mnie viadoma, siarod zatrymanych bajcoŭ «Tarnada» niama naohuł hramadzianaŭ Biełarusi», — kaža siastra Barysa Hulčuka.

Ani Piačerski rajonny, ani Apelacyjny sud nie źviarnuli ŭvahi na niedakładnuju infarmacyju vajskovych prakuroraŭ. Adnak i abarona bajca «Tarnada» navat nie vykarystoŭvaje hetuju pamyłku, kab vyzvalić jaho z-za krataŭ.

«Ja nia viedaju, adkul prakuratura ŭziała źviestki, što Barys Hulčuk — hramadzianin Biełarusi. Ale fakt zastajecca faktam. Jašče mahu dadać, što siarod zatrymanych jość adzin bajec, na jakoha nie pakazvaje navat paciarpieły. Inšy zatrymany naohuł pad čužym proźviščam, a ŭ dadzienych adnosna jašče adnaho zatrymanaha ŭkazany nie jahony adras pražyvańnia. Takija ž i abvinavačańni, vysmaktanyja z palca», — skazaŭ advakat zatrymanych Ihar Čerazaŭ.

U toj ža čas prakuror, jaki pradstaŭlaŭ abvinavačańnie na sudovym pracesie pa razhladzie skarhi na zatrymańnie, naohuł admoviŭsia patłumačyć niedakładnaści. Jon hatovy byŭ raspavieści tolki pra złačynstvy, u jakich abvinavačvajucca dobraachvotniki. Advakat u vajskovym pravie Anatol Bašłoŭka, jaki abaraniaje niekalkich dobraachvotnikaŭ ź inšaha bataljonu «Ajdar», tłumačyć takija niedakładnaści ŭ spravie suprać «Tarnada» nieprafesijanalizmam prakuroraŭ:

«Heta aznačaje, što Hałoŭnaja vajskovaja prakuratura Ŭkrainy pracuje nieprafesijna, paśpiešliva farmuluje abvinavačańni i vydaje žadanaje za sapraŭdnaje. Usie apošnija publičnyja zajavy hałoŭnaha vajskovaha prakurora Anatola Macijasa raźličanyja vyklučna na publiku. Dokazaŭ vinavataści bajcoŭ nie pradstaŭlena, što paćviardžaje palityčnuju nakiravanaść hetaj spravy».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?