65-hadovy pradprymalnik Viktar Ciareščanka paćvierdziŭ, što maje namier bałatavacca na prezidenckich vybarach. «Dva dni tamu ja pryniaŭ takoje rašeńnie, - skazaŭ Viktar Ciareščanka. – Ciapier farmirujecca inicyjatyŭnaja hrupa. Spadziajusia, što ŭ jaje ŭvojdzie 1500-3000 čałaviek. Heta ŭsio prahresiŭnyja ludzi, usie pracujučyja, ale jany chočuć niešta źmianić u krainie».
fota BiełaPAN
Viktar Ciareščanka abiacaje, što 16-17 lipienia paniasie ŭ CVK zajaŭku na rehistracyju inicytyŭnaj hrupy. Čamu pradprymalnik vyrašyŭ pryniać udzieł u vybarach? «Oj, heta ciažki momant. Byŭ sapraŭdny boj u siamji. Vy ž razumiejecie, što aproč strat zdaroŭja i srodkaŭ heta ničoha nie prynosić. Ale treba razumieć, što hałoŭnaje siońnia – heta nie kavałak chleba, a budučynia našych dziaciej».
Imavierny kandydat pakul nie nazyvaje imia kiraŭnika svajho pieradvybarčaha štaba. Što tyčycca kaardynacyi z apazicyjnymi kandydatami, to Ciareščanka kaža, što trymaje suviaź z Taćcianaj Karatkievič i Siarhiejem Kalakinym. «Razmaŭlali pa telefonie ź Siarhiejem Hajdukievičam. Treba razumieć, što z usimi mahčymymi kandydatami ŭ nas adzinstva pohladaŭ, viadoma, budziem kaardynavacca, dapamahać adzin adnomu».
Viktar Ciareščanka ŭžo ŭ čaćviorty raz vyłučajecca kandydatam u prezidenty. U 1994-m i 2001-m jon nie sabraŭ nieabchodnyja 100 tysiač podpisaŭ. Zarehistravany Ciareščanka kandadydatam byŭ tolki adnojčy – u 2010-m. Tady jon byŭ adzinym kandydatam, aproč Łukašenki, jakoha nie aryštavali ci zatrymali ŭ noč paśla vybaraŭ.
Ciareščanka naradziŭsia ŭ 1950-m u Krasnapolskim rajonie na Mahiloŭščynie. Jon kandydat ekanamičnych navuk. Byŭ deputatam Viarchoŭnaha Savieta CHIII sklikańnia. Uznačalvaŭ «Mižnarodny instytut mieniedžmientu». Byŭ staršynioj Biełaruskaj narodnaj partyi.
