Zasnavalnik kulturna-aśvietnaj ustanovy «Płatform inaviejšn» viciabčanin Michaił Žamčužny pryhavorany da šaści hadoŭ pazbaŭleńnia voli ŭ kałonii strohaha režymu. Takoje rašeńnie pryniaŭ 10 lipienia Viciebski abłasny sud, paviedamlaje sajt «Płatform inaviejšn».
Sud nad Žamčužnym pačaŭsia 1 červienia i prachodziŭ u zakrytym režymie. Jon abvinavačvaŭsia pa artykułach 376 (č.1, č.2), 375 (č.1) i 431 (č.1, č.2) Kryminalnaha kodeksa: naŭmysnaje abviaščeńnie źviestak, jakija składajuć słužbovuju tajnu; niezakonnaje nabyćcio (vyrab) srodkaŭ dla niepubličnaha atrymańnia infarmacyi, jakaja składaje słužbovuju tajnu; dača chabaru.
Zaraz Michaił Žamčužny i jaho advakat rychtujuć kasacyjnuju skarhu na pryhavor.
Dla Žamčužnaha heta ŭžo druhi termin: z 2007 hoda pa 2012-y jon adbyvaŭ pakarańnie pa ekanamičnym artykule. Mienavita ŭ suviazi ź nieadbytym pa pieršym pryhavory dadatkovym pakarańniem (2 hady i 8 miesiacaŭ pazbaŭleńnia prava zajmacca arhanizacyjna-pravavoj dziejnaściu) Michaił nie trapiŭ pad amnistyju. Nieadbytaje pa papiarednim pryhavory dadatkovaje pakarańnie dałučana da novaha pryhavoru suda.
Paśla nabyćcia pryhavoram mocy Žamčužny budzie adpraŭleny ŭ adnu z kałonij, dzie ŭtrymlivajucca asudžanyja, jakija paŭtorna ŭčynili złačynstvy, — heta papraŭčyja kałonii № 5 (Ivacevičy), № 8 (Orša), № 9 (Horki), № 11 (Vaŭkavysk), № 14 (Barysaŭski rajon) i № 20 (Mazyr).
59-hadovy Michaił Žamčužny — były dacent Viciebskaha technałahičnaha ŭniviersiteta, kandydat techničnych navuk, aŭtar niekalkich navukovych manahrafij i raspracovak, vynachodnik, jaki pieršy ŭ Biełarusi zarehistravaŭ samarobny aŭtamabil na alternatyŭnym palivie. Z 2007 hoda pa 2012-y Žamčužny ŭžo adbyvaŭ pakarańnie pavodle ekanamičnaha artykuła KK. Pakolki Žamčužny mała viadomy siarod hramadskich aktyvistaŭ, pra jaho aryšt daviedalisia tolki praz paŭtara miesiaca paśla zatrymańnia.
Varta zaznačyć, što Žamčužny byŭ zatrymany nieŭzabavie paśla vyniasieńnia pryhavoru pa spravie byłoha kiraŭnika «Płatform inaviejšn» Andreja Bandarenki. 12 žniŭnia 2014 hoda sud Kastryčnickaha rajona Minska pryznaŭ Bandarenku vinavatym va ŭčynieńni chulihanstva, złosnaha chulihanstva i asabliva złosnaha chulihanstva (čč. 1, 2 i 3 artykuła 339 KK). Jaho pryhavaryli da čatyroch hadoŭ pazbaŭleńnia voli ŭ kałonii ŭzmocnienaha režymu, ale ŭ suviazi z amnistyjaj termin byŭ skaročany da troch hadoŭ.
Kulturna-aśvietnaja ŭstanova «Płatform inaviejšn» zajmajecca abaronaj pravoŭ čałavieka ŭ miescach pazbaŭleńnia voli. Jana stvoranaja na bazie infarmacyjna-aśvietnaj ustanovy «Płatforma», jakaja ŭ kastryčniku 2012 hoda była likvidavanaja rašeńniem Minskaha haspadarčaha suda. Inicyjataram stvareńnia i kiraŭnikom abiedźviuch arhanizacyj źjaŭlajecca Andrej Bandarenka.
