Za šeść miesiacaŭ hetaha hoda kolkaść rasijskich turystaŭ, jakija adpačyvajuć u Biełarusi, źmienšyłasia na tracinu ŭ paraŭnańni z adpaviednym letašnim pieryjadam. Pra heta paviedamiŭ načalnik adździeła markietynhu i rekłamy RUP «Centrkurort» Siarhiej Vierłup na kruhłym stale ŭ Minsku 13 lipienia.
Pavodle jaho słoŭ, rasijskija adpačyvalniki składajuć bolš za 40% u biełaruskich sanatoryjach i damach adpačynku.
Siarod pryčyn źnižeńnia popytu na biełaruskija zdraŭnicy z boku rasijskich turystaŭ Vierłup nazvaŭ «zapavolvańnie rostu ekanomiki Rasii». Aprača taho, zaznačyŭ jon, «u Rasii nazirajecca rost patryjatyčnych nastrojaŭ, cikavaści da svajoj krainy i, adpaviedna, da rasijskich kurortaŭ».
Razam z tym ofis «Centrkurorta» ŭ Maskvie funkcyjanuje, i kampanija zachavała mnohich svaich pastajannych klijentaŭ, skazaŭ Vierłup. «Jany ceniać vysoki ŭzrovień miedycynskaha absłuhoŭvańnia ŭ zdraŭnicach Biełarusi, — rastłumačyŭ jon. — U pryjarytecie rasijan zastajecca azdaraŭleńnie, adpačynak u nacyjanalnych parkach. My budziem imknucca akazvać usio bolšuju kolkaść pasłuh u sanatoryjach i damach adpačynku, pašyrać śpiektr pasłuh, u tym liku jakija akazvajucca praź internet. My stvarajem dla klijenta maksimalna kamfortnyja varyjanty pa braniravańni i apłacie».
Viadučy markietołah sanatoryja «Prymorski» (na Zasłaŭskim vadaschoviščy) Aksana Ciščanka paviedamiła, što popyt z boku rasijan na pasłuhi zdraŭnicy źmienšyŭsia ŭ dva razy. Kali letaś u sanatoryi nie było miescaŭ za niekalki miesiacaŭ, to zaraz kolkaść pradažu źmienšyłasia, i kupić pucioŭku možna napiaredadni zajezdu. Dla pryciahnieńnia turystaŭ sanatoryj uvioŭ skidki dla dziaciej, piensijanieraŭ, a taksama na zimovy pieryjad.
Vykonvajučy abaviazki dyrektara Nacyjanalnaha ahienctva pa turyźmie Ryhor Pamiarancaŭ kanstatavaŭ padzieńnie ekspartu turpasłuh u cełym u krainie. Pavodle źviestak Ministerstva sportu i turyzmu, za studzień—sakavik 2015 hoda ekspart turpasłuh skłaŭ 29,2 młn. dołaraŭ pry płanie 80 młn. dołaraŭ. U 2014 hodzie prahnozny pakazčyk pa eksparcie turpasłuh nie vykanany nivodnaj vobłaściu i horadam Minskam.
Na dumku Pamiarancava, takaja situacyja źviazana najpierš z kryzisnymi źjavami ŭ metavych rynkach, samym značnym ź jakich źjaŭlajecca Rasija, adkul u Biełaruś pryjazdžajuć 70% zamiežnych turystaŭ. Siarod astatnich 30% — turysty ź Litvy, Polščy, Ukrainy. Bolš za ŭsio hrošaj u Biełarusi pakidajuć turysty ź Vialikabrytanii, Hiermanii, Hałandyi, Italii i Turcyi.
Takim čynam, skazaŭ Pamiarancaŭ, u Biełarusi nieabchodnaja dyviersifikacyja turystyčnych pasłuh dla vyklučeńnia zaležnaści ad rasijskaha kirunku. Adnak hetamu pieraškadžajuć prablemy vizavaha režymu, transpartnaj dastupnaści, brendu krainy i rehijonaŭ.
