Prezident Ukrainy Piatro Parašenka zajaŭlaje, što kanflikt u Mukačavie paŭstaŭ z-za pieraraźmierkavańnia patokaŭ kantrabandy.
Reuters
Pra heta jon skazaŭ na pasiadžeńni Vajennaha kabinieta Savieta nacyjanalnaj biaśpieki i abarony, na jakim abmiarkoŭvajecca situacyja ŭ zonie praviadzieńnia antyterarystyčnaj apieracyi, a taksama situacyja, jakaja skłałasia ŭ suviazi z bandyckimi dziejańniami ŭ Mukačavie.
Kiraŭnik ukrainskaj dziaržavy padkreśliŭ, što padziei ŭ Mukačavie pakazali šerah naśpiełych prablemnych pytańniaŭ, jakija patrabujuć nieadkładnaha rašeńnia.
«Pavinny razbłytać kłubok zastarełych prablem, jakija patrabujuć nieadkładnaha rašeńnia. Ja pra kłanavaść, kantrabandu, karupcyju i da taho padobnaje. Karcina taho, što ciapier tam adbyvajecca, nie čorna-biełaja. Jana prosta žudasna čornaja», — zajaviŭ kiraŭnik dziaržavy.
Prezident padkreśliŭ, što sutnaściu kanfliktu ŭ Mukačavie źjaŭlajecca pieraraźmierkavańnie patokaŭ kantrabandy, i zajaviŭ, što patrabuje rašučych dziejańniaŭ ad pravaachoŭnych orhanaŭ u baraćbie z kantrabandaj.
«Pavinna być žorstkaje i pryncypovaje rasśledavańnie ŭ dačynieńni da ŭsich, chto da hetaha datyčny. Pieratrusy, zatrymańni i pramaja kryminalnaja adkaznaść. Nie dapamohuć ni deputackija mandaty, ni suviazi va ŭładzie», — padkreśliŭ Parašenka.
Kiraŭnik dziaržavy daŭ daručeńnie zrabić kadravyja vysnovy pa vynikach rasśledavańnia.
«Kantrabanda nie źjaŭlajecca vyklučna Zakarpackaj prablemaj. Tolki my pačali zaciskać hajki — adrazu ŭsia hetaja poskudź pavyskokvała. Kantrabandysty Zakarpaćcia kinuli vyklik ŭsioj Ukrainie. Ja chaču zajavić — my hety vyklik prymajem», — zajaviŭ Parašenka.
Jak paviedamlałasia raniej, u Mukačovie dniom 11 lipienia pačałasia stralanina, u vyniku jakoj jość paranienyja i zahinułyja. Pavodle paviedamleńniaŭ miascovych ŚMI, kanflikt uźnik pamiž udzielnikami «Pravaha siektara» i ludźmi z akružeńnia narodnaha deputata Michaiła Łańjo. Pavodle viersii pradstaŭnikoŭ «Pravaha siektara», deputat Łańjo sam vyklikaŭ ich na pieramovy, pakolki «PS» pačaŭ pieraškadžać patokam kantrabandy.
Pa dadzienym fakcie raspačataja kryminalnaja sprava pa č. 1 art. 255 Kryminalnaha kodeksa Ukrainy — stvareńnie złačynnaj arhanizacyi i č. 3 art. 258 — terarystyčny akt.
Niekalki bajcoŭ «Pravaha siektara» paśla incydentu chavajucca ŭ lesie. SBU zaklikała bajcoŭ dobraachvotna zdać zbroju.
