Ekzamieny i sesii zdadzienyja, leta palivaje daždžami, čarhovy siezon «Hulni tronaŭ» skončyŭsia, a da novaha «Šerłaka» jašče daloka? U śviecie jość jašče bahata telesieryjałaŭ, jakimi možna zaniać panury viečar. «Naša Niva» prapanuje siem sieryjałaŭ, što siońnia «ŭ trendzie» na Zachadzie, ale zastajucca małaviadomymi ŭ Biełarusi.
Hotem
Sieryjał pra śviet Betmiena abyšoŭsia biez Betmiena. U časy, pra jakija jon raspaviadaje, Betmiena jašče nie było — byŭ tolki maleńki chłopčyk Brus Uejn, čyich baćkoŭ-miljarderaŭ zabili nieviadomyja. Zabojstva baćkoŭ, a taksama mnostva inšych złačynstvaŭ Hotema, rasśledujuć kamisar Hordan, jašče małady i niedaśviedčany idealist, i jaho cyničny dy bolš prafiesijny naparnik Charvi Bułak. U sieryjale źjaviacca maładyja Žančyna-kotka, Pinhvin, Zahadačnik, Charvi Dent (jaki stanie Dvulikim) i mnohija inšyja hieroi kłasičnych komiksaŭ.
Pakul vyjšaŭ tolki pieršy siezon sieryjała, jon zavieršyŭsia ŭ mai, start druhoha — u vieraśni.
Nie ŭrazilisia «Hotemam»? Apošnim časam bahata vydatnych supierhierojskich sieryjałaŭ: «Fłeš» pra zvyšchutkaha supierhieroja, «Sarvihałava» pra ślapoha supierhieroja, «Ahient Kartar» pra zvyčajnuju dziaŭčynu-ahienta, jakaja sprabuje dapamahčy Hovardu Starku, baćku budučaha Žaleznaha čałavieka…
Jak paźbiehnuć pakarańnia za zabojstva
Prafiesar i vybitny advakat Enaliz Kitynh abiraje piać studentaŭ dla prachodžańnia praktyki na svajoj firmie. U sieryjach-fłešbekach jany skarystajucca viedami ź jaje kursu lekcyj, jaki jana nazvała «Jak paźbiehnuć pakarańnia za zabojstva» i buduć rasśledavać dva chitra źviazanych miž saboj zabojstvy, a tym časam sami traplajuć pad padazreńnie. Sieryjał nie padobny da zvyčajnych detektyŭnych: asablivaj intryhi nibyta i niama, usio viadoma niby ad pačatku, a padziei razhortvajucca zanadta chutka. Za što jaho palubili hledačy i krytyki? Ciažka rastłumačyć, treba prosta hladzieć.
Pieršy siezon sieryjała zavieršyŭsia ŭ lutym, nastupny startuje ŭ vieraśni.
Lubicie bolš tradycyjnyja detektyvy? Pasprabujcie nea-nuar «Sapraŭdny detektyŭ», jakraz idzie druhi siezon z novymi hierojami i novymi złačynstvami.
Aranžavy — chit siezonu
Što budzie ź miłaj błandynkaj ź siaredniaha kłasu, kali jana na 15 miesiacaŭ trapić u amierykanskuju turmu? Kamiedyjny sieryjał sprabuje pakazać dramatyčnyja padziei ŭ turemnym piekle z dolaj humaru. Hałoŭnaja hierainia dobra vyvučyć turemnyja noravy pierad adbyvańniem pakarańnia, ale ŭ turmie sustrenie zusim nie toje, pra što čytała ŭ teoryi, a taksama sustreniecca sa zmročnaj siabroŭkaj-złačyncam, za dapamohu jakoj u maładości i trapiła ŭ turmu. Pryjdziecca pieraŭtvarycca z typovaj błandynki ŭ suvoruju bajavuju žančynu.
Miesiac tamu vyjšaŭ treci siezon sieryjału, na 2016 hod zapłanavany čaćviorty, ale sieryjał nie hublaje cikaŭnaść aŭdytoryi.
Što-niebudź viasiołaje i nie pra turmu? Pasprabujcie «Z karabla», što raspaviadaje pra novaje žyćcio azijackaj siamji ŭ ZŠA.
Mistar Robat
Kali vas razdražniaje, što ŭ kino chakiery ŭzłamvajuć sierviery FBR za 15 siekund manatonnaha stuku pa kłavijatury, kali vy rasčaravalisia ŭ chakierskaj hulni Watch Dogs praź jaje dziravy siužet, kali vam padabajecca novy styl Paŭła Durava, ale nie padabajecca, što va ŭsich intervju jon nudzić pra adno i toje ž, pasprabujcie «Mistara Robata». Komiksavaja chakierskaja estetyka i realistyčnyja techničnyja padrabiaznaści, zmročnyja manałohi hałoŭnaha hieroja i vysokija mety ŭ brudnym śviecie, navat nazvy sieryj, stylizavanyja pad standartnyja nazvy fajłaŭ z roznymi rasšyreńniami.
Pakul idzie pieršy siezon sieryjała. Jaho ŭžo praciahnuli na druhi siezon — adrazu paśla vychadu druhoj sieryi pieršaha.
Pra IT, ale nie pra chakieraŭ? «Kremnijevaja dalina» nie biez humaru raspaviadzie pra typovy startap i jaho vyžyvańnie ŭ śviecie vialikaha (i nie vielmi) biźniesu.
Kartačny domik
Dziŭna, ale sieryjał, jaki hladzić Barak Abama i pałova Štataŭ, u Biełarusi prajšoŭ praktyčna niezaŭvažanym. Viadoma, sioleta ŭ Biełarusi svoj palityčny sieryjał, vybary-2015, ale jaho žanr pakul ciažka vyznačyć. Z žanram «Kartačnaha domika» praściej: heta palityčny tryler. Kanhresmien-demakrat u vykanańni Kievina Spejsi ŭ abychod usialakich pravił robić supartyjca prezidentam, ale nie atrymlivaje abiacanaj za heta pasady vice-prezidenta i pačynaje pomścić. Darečy, sieryjał naradziŭsia dziakujučy analizu infarmacyi pra karystalnikaŭ: prahramisty Netflix pabačyli, što hledačoŭ zacikavić niešta ad Devida Finčera z Kievinam Spejsi ŭ hałoŭnaj roli, — i prapanavali zrabić sieryjał, što staŭ amierykanskim chitom.
Treci siezon sieryjała vyjšaŭ u lutym, hetym letam startavali zdymki čaćviortaha.
Dałoŭ palityku, daješ anarchiju? Raim «Revalucyju» — sieryjał pra postapakaliptyčnuju budučyniu biez elektryčnaści, ale z apałčeńniem, bajevikami i chuntami.
Ataka tytanaŭ
Mnohija ličać, što anime — źjava dla japoncaŭ i asobnych niešmatlikich fanataŭ-hikaŭ. Ale jak niekali zachodni śviet skaryli poŭnamietražnyja stužki Chajaa Mijadzaki, tak ciapier Zachad palubiŭ anime-sieryjał «Ataka Tytanaŭ». U adroźnieńnie ad bolšaści anime, u «Tytanach» niama nastyrnaha seksualnaha padtekstu, a złodziei — biazdušnyja jak stychijnaja źjava. Treba pryznać, što bajaźlivaść hierojaŭ časam razdražniaje, złodziei nie vyklikajuć dastatkovaha strachu, a zaciahnutaść dziejańnia mnohich prymusić zakinuć sieryjał na siaredzinie. Dy da sieryjału zachočacca viarnucca — kožnaja sieryja zaviaršajecca kancoŭkaj-klifchenhieram, što namiakaje na zachaplalny praciah.
Adziny siezon sieryjału pakazvaŭsia jašče ŭ 2013 hodzie, ale znoŭ nabyŭ papularnaść paśla čutak ab novym siezonie, što ŭžo pryznačany na 2016 hod.
Anime pavinna być bolš łahičnym i realistyčnym, ale znoŭ ža biez seksualnaha padtekstu? Stary «Planetes» z uvahaj da detalej raspaviadaje pra budni kaśmičnych zborščykaŭ śmiećcia ŭ atmaśfiery, što vielmi nahadvaje postsaviecki navukova-daśledčy instytut.
Śvietlačok
Uzimku nas čakaje hałoŭnaja kaśmičnaja epapieja — novyja «Zornyja vojny». A pakul možna pryhadać kłasičny kaśmičny sieryjał u kosmasie bieź inšapłanietnikaŭ i hihanckich batalij. «Śvietlačok» u svoj čas skaryŭ hledačoŭ suśvietam vesternu ŭ kosmasie i siamiejnaj atmaśfieraj u kamandzie mižpłanietnych kantrabandystaŭ.
Ale pakaz sieryjału spynili, nie pakazaŭšy navat usie sieryi. Praz padtrymku fanataŭ byŭ vypuščany poŭnamietražny film «Misija Sierenici», što zakryvaŭ siužet sieryjału. Dy fanatam było mała, jany patrabavali druhi siezon, zamiest jakoha ŭ hetym hodzie atrymajuć anłajn-hulniu.
Pahladzieli «Śvietlačka», palubili jaho dy ciapier škadujecie, što mała? U vielmi padobnuju atmaśfieru pahružaje anime-sieryjał kanca 90-ch «Kaŭboj Bibop», taksama amal vestern u kosmasie z ekipažam, što chavaje nie mienš škiletaŭ u šafie.
***
Chočacie parekamiendavać inšyja sieryjały, što na vašuju dumku nie nabyli naležnaj papularnaści ŭ Biełarusi? Napišycie pra ich u kamientarach!
