Navat adkryćcio restarana chutkaha charčavańnia ŭ biełarusaŭ robicca šturškom dla abmierkavańnia składnikaŭ nacyjanalnaha charaktaru. Na padstavie drenna zadakumientavanych pavodzin asobnych jołupniaŭ robiacca vysnovy, što abražajuć usich biełarusaŭ jak supolnaść. Ja daŭ trolam vykazacca i ścichnuć. Chacieŭ by padahulić dyskusiju niekalkimi vysnovami.
Biełarusy asaromilisia na adkryćci Burger King», — paviedamlaje papularny sajt By24 i dadaje pra čerhi ŭ try-čatyry hadziny. «Pradam miesca ŭ čarzie», — repościcca žart z sacyjalnych sietak. «Soramna za biełarusaŭ», — piša na Absolvo.ru Dźmitryj Vałotka: «Nacyja, jakaja ličyć siabie častkaj Jeŭropy, staić u ahromnistych čerhach u niejkuju straŭniu. Badaj, heta advarotny bok sučasnaj jeŭrapiejskaj Biełarusi. Nacyja choča być u Jeŭropie, ale pavodzić siabie jak jeŭrapiejcy nie žadaje». Vałotka ahučyŭ tezis, jaki sustrakajecca paŭsiudna: «Ja nie mahu skazać, što abjeździŭ Jeŭropu ŭzdoŭž i upopierak, ale moj vopyt padkazvaje: u sučasnych jeŭrapiejskich krainach samaścijnych čerhaŭ u adkrytyja ŭstanovy fastfudu niama. Jany mohuć być stvoranyja naŭmysna, dziela pryhožaj karcinki na miascovym TB (??), ale heta nie ŭsprymajecca hramadstvam jak dobraja i matyvavalnaja rekłama. Soramna za tych, chto zrabiŭ z adkryćcia charčeŭni, zvyčajnaj kropki ahułpitu, śviata i padzieju. U čarzie možna było zaŭvažyć cełyja siemji, ź dziećmi. Nie chapaje tolki śviatočnaj muzyki i ściahaŭ na słupach».
Z hetaha i inšych hreblivych kamientaroŭ, jakich sotni (pahladzicie, naprykład, tut , tut i tut vynikała, što biełarusy «hałodnyja», što jany prahnuć burhieraŭ i ŭsio nijak nie najaducca.
Na pieršym kole hety prymityŭny nakid abvierh Pavieł Śviardłoŭ na Kyky.org. Voś tut možna pačytać tekst, u jakim jon tłumačyć, čamu jamu nie soramna za pavodziny biełarusaŭ. Ale Pavieł nie dachodzić u svaich razvahach da adnaho pryncypovaha punktu, u jakim nierv situacyi. Na jahonuju dumku, pamyłka ŭsich, chto papraknuŭ biełarusaŭ «zhaładałaściu» i «bidonami» (pra bidony paźniej) — u tym, što jany raspaŭsiudžvajuć hreblivaja pavodziny dvuch dzivakoŭ na ŭsiu nacyju. «Ich krychu škada, sapraŭdy, tak. Ale heta ich prablemy, nie našyja. I tym bolš nie prablemy cełaj krainy», — piša Pavieł. Ale ja b istotna pierahledzieŭ hety tezis. Toje, što my bačyli ŭ siecivie paśla adkryćcia, — nie prablema zusim. Śmiešna čytać, što biełarusaŭ pryviała ŭ Burger King niejkaja «haładucha».
Sprava ŭ tym, što hałodnyja ludzi ŭ Burger King nie chodziać. Burger King — dla fanu, a nie dla ježy.
Fotki vializnych čerhaŭ na adkryćci Burger King u Francyi karystalnik Zorg źmiaściŭ jašče ŭ kamientarach da pasta Vałotki. Toje ž samaje adbyvałasia ŭ Finlandyi i inšych krainach. Dyk što ŭ hetych pavodzinach niejeŭrapiejskaha? Biełarusy stajać u čerhach u novuju straŭniu, dzie rychtujucca patracić hrošy. Zusim jak typovyja niemcy ci francuzy. Jak šopiery, a nie jak dzikuny!
Jany čujuć pra adkryćcio novaha amierykanskaha restarana i prychodziać pakaštavać burhiery. Hetki ž ažyjataž ciapier nazirajecca ŭ jašče adnym sietkavym miescy, adkryćcio jakoha prajšło bieź vialikich miedyjnych skandałaŭ, — amierykanskaj piceryi Papa Johns.
Biełarusy pastupova spryčyniajucca da hłabalizacyi.
Kab jany byli «kałchazanami» — nie vialisia b na markietynhavyja majsy, ad jakich na dybki stanoviacca žychary Jeŭropy i ZŠA. Toje, što na adkryćcio Burger King sabrałasia čarha, pakazvaje nie «hałodnaść», a hatoŭnaść (dy, vyhladaje, prahu) hłabalizavacca. Šmat času hetaja praha być nie horš za Vilniu ci Varšavu strymlivałasia tym, što tut prosta nie było sietkavych miescaŭ akramia McDonalds, jakomu — ja navat dumać bajusia, za jakija zasłuhi, — niekali vielmi paščaściła. Zaraz hetaja situacyja budzie imkliva vypraŭlacca źjaŭleńniem kankurencyi. Chutka adkryjecca KFC, źjaviacca inšyja sietki.
Našaja ciapier užo niepaźbiežnaja hłabalizacyja — heta i drenna, i dobra. Dobra — tamu, što narešcie my zrobimsia takimi, jak usie, i nas užo nie budzie vabić kancepcyja biaspłatnaj koły. Drenna — tamu, što my stracim značna bolej, čym atrymajem, u pieršuju čarhu našyja ŭnikalnyja ŭjaŭleńni pra hrošy i ich miesca ŭ žyćci, našuju, tak by mović, manietarnuju kaštoŭnasnuju čyściniu.
I asobna pra «bidonščykaŭ». Sprava ŭ tym, što ja nie baču nijakaj viny za hetymi ludźmi. Ni finansavaj, ni simvaličnaj.
Jany (nasamreč jana, bo apublikavanyja fotazdymki dakazvajuć tolki adzin vypadak, z žančynaj, chłopiec moh stajać z kanistraj kvasu, jak pra heta ŭžo paviedamlałasia ŭ siecivie) pryjšli na adkryćcio charčeŭni, što suśvietna viadomaja tolki i vyklučna refiłam. Bo najaŭnaściu cybuli ŭ vopiery nikoha nie pryciahnieš, chutčej adšturchnieš.
Dyk vidavočna, što mahčymaść brać i nieści, pić i pić, kazytała ŭjaŭleńnie bolej, čym burhiery. Jana, hetaja mahčymaść, bliskuča vykanała svaju markietynhavuju rolu. Burger King dziakujučy «bidonščykam» trapiŭ u miedyi i ŭ našyja z vami hałovy. Ci kaštavała heta tych dvuch dalaraŭ (u najhoršym vypadku!), na jakija kampanija paciarpieła? Vidavočna, tak! Bolej za toje, heta nie biełarusy zastalisia vinnyja Burger King. Heta Burger King zastaŭsia vinny ŭsim hetym ludziam, jakija vynieśli jaho ŭ temy ruskaha Tvitara i tym samym dazvolili hučna zajavić pra siabie praz samuju efiektyŭnuju rekłamu — tuju, što napatkoŭvaje čałavieka ŭ mabilnym telefonie, u stužcy siabroŭskich pastoŭ. Dyk ci vartyja «bidonščyki» hreblivaha śmiechu?
Refił nie zabaronieny, jon razrekłamavany. Paviedamleńnie pra «sanitarnyja normy», jakija byccam nie dazvalajuć ludziam napaŭniać ich taru, u momant adkryćcia restaracyi vyviešanaje nie było. Dyk jakija mohuć być pytańni?
Ciapier Burger King stryže ščodryja kupony, jon na Tut.by, tłumačyć, što jany refił nie zabaroniać. My ŭmilajemsia — nu jakija ž kociki! A toje, što sama hetaja navina, dzień jaje ratacyi i repostaŭ (a razyšłasia jana šyroka) kaštuje bolej, čym usie nastupstvy refiłu, — pa za dužkami.
Ja dobra viedaju, što budzie dalej. Paśla taho jak «bidonščyk» staŭ trendam ruskaha Tvitara, žartam tydnia UKantakciku, našyja ludzi ŭ Burger King buduć chutčej naŭmysna niedalivać sabie pa santymietry toj koły. Tolki b nie vyhladać «niščabrodami».
Takoje ŭ nas pačućcio «narmalnaści» i «ludskaści». Takaja ŭ nas nacyjanalnaja schilnaść da samajedstva.
Dyk adzinaje pra što možna kazać u kantekście kiejsu Burger King, — heta pra toje, što pačućcio nacyjanalnaj niepaŭnavartaści — našaja surjoznaja chvaroba. My ŭsurjoz upeŭnienyja, što amierykanskija padletki nie pjuć kołu pa dva, try razy z adnaho kufla (nie pili b — nie było heta markietynhavaj vabaj).
Siabry!
My — hodnyja i vychavanyja ludzi. Nie varta vieścisia na sproby nas abrazić, u tym liku z boku tych, chto sam biełarus i zabyŭsia na heta.
