Nie pužajciesia: nijakaj palityki, nijakaj krytyki — tolki hoły fakt z kramy «Jeŭraopt». Biez fotazdymkaŭ. Fatahrafavać naš roskvit nielha, kab paźbiehnuć čaho? Kab złaśliŭcy infarkt ad zajzdraści nie schapili! Tak, u kramu, pa kiefir… Torbu treba pakinuć pry ŭvachodzie, u kamiery zachoŭvańnia. Trafaret: «Administracyja za zachavanaść rečaŭ adkaznaści nie niasie». I pravilna robić! Złačynnaść u nas (kali vieryć spravazdačam MUS, a ŭsie vierać) štohod źnižajecca. Chutka budzie praktyčna roŭnaja nulu.
Jačejki mieściacca pa biełaruskim dyzajnie — nižnim šeraham možna skarystacca tolki ŭ troch pozach: 1) na kukiškach; 2) u pozie «prački»; 3) ležačy na padłozie.
Vierchni šerah častkova adčynieny, a častkova zaklejeny papierčynaj z nadpisam «Nie pracuje».
Zakonapasłuchmianaja, jak i ŭvieś narod, babula prysieła na kukiški i pavaliłasia na padłohu. Uzrost nie toj, dy i spartyŭnych pabudoŭ dla tych, kamu za 80, niedastatkova…
Ustać babulka zmahła, ale tolki na kaleni. Ja dapamahła padniacca.
— Što, babula, kiepska?
— A što zrobiš?
Voś tak, pytańniem na pytańnie! A ničoha nie zrobiš! Padniać nižni šerah jačejek na adzin mietr — heta nikomu ŭ hałavu nie pryjdzie: ni administracyi kramy, jakaja adkaznaści nie niasie, ni achoŭnikam, ni dyzajnieraŭ prajekta heta nie začepić.
«Što zrobiš?» Samyja na kaleniach stojcie! Vas heta zadavalniaje. Lubaja krytyka ŭsprymajecca tak, byccam ty vorah, radzimu pradaješ abo jašče što horšaje. Nie padabajecca — źjazdžaj!
A voś mnie ŭsio padabajecca! Padabajecca naša milicyja. Padabajecca naš handal, česny i vietlivy. Padabajecca daterminovaje hałasavańnie, padabajecca moj ŽES, ŽREA, achova zdaroŭja.
Kaho ja jašče zabyła? Naš narod, jaki žyvie pa pryncypie babuli na kaleniach u «Jeŭraopcie»: «A što zrobiš?».
Tak i žyvicie! Ničoha nie rabicie. Cišej budzie, a to vakoł Majdany, Jemieny, Siryja ź Livijaj, dalar skača, jak šalony koń. Nam ža spakojna, čysta, uježna… I žančyny najpryhažejšyja ŭ śviecie, a heta i jość našaje prostaje biełaruskaje ščaście!
Taćciana Kanstancinaŭna Karelina, Minsk, adna z «samych» u śviecie
