Druhim na rehistracyju inicyjatyŭnaj hrupy pa vyłučeńni kandydatam u prezidenty na vybarach 2015 hoda padaŭ lidar Biełaruskaj partyi levych «Spraviadlivy śviet» Siarhiej Kalakin. Adbyłosia heta ŭ 11:10.
Kiraŭnikom inicyjatyŭnaj hrupy budzie Valeryj Uchnaloŭ. Kalakin i Uchnaloŭ razam padavali dakumienty, jakija pryniała zahadčyk arhanizacyjna-pravavoha adździeła Halina Mkrtyčan.
Jak paviedamiŭ Siarhiej Kalakin «Našaj Nivie» ŭ skład jaho inicyjatyŭnaj hrupy ŭvachodzić 1513 čałaviek va ŭzroście ad 18 da 95 hadoŭ. «13 — majo ščaślivaje čysło», — adznačyŭ Kalakin.
«Mnie lohka iści na vybary, — kaža jon. — Bo ŭładzie sioleta niama čaho prapanavać».
Kalakin zaznačaje, što pakul zdymacca na karyść Anatola Labiedźki abo Taćciany Karatkievič jon nie źbirajecca.
«Heta i dobra, što apazicyja idzie na vybary tryma kałonami. Jość vybar», — dadaje jon.
Siabie jon pazicyjanuje jak sacyjalista, što pradstaŭlaje levy fłanh. Karatkievič, na jaho dumku, — centrystka, Labiedźka pradstaŭlaje pravy fłanh.
Kalakin taksama dadaŭ, što padtrymki ŭ Maskvie, u adroźnieńnie ad Łukašenki, nie šukaje.
Prezidenckija vybary zapłanavanyja na 11 kastryčnika.