Fota z archivu «Našaj Nivy»
Novaja sistema apłaty prajezdu, što ŭžo hod dziejničaje ŭ staličnym hramadskim transparcie, dazvoliła prapanavać značna bolš taryfaŭ, dazvoliła zekanomić na kanduktarach, aptymizavać maršrutnuju sietku i pavialičyć zbory pa štrafach, raspaviała ahienctvu «Minsk-Naviny» namieśnik hiendyrektara «Minsktransa» Iryna Jakuboŭskaja.
Suma štrafaŭ u pieršaj pałovie 2015 hoda vyrasła na 30% u paraŭnańni z anałahičnym pieryjadam 2013 hoda, kali validataraŭ jašče nie było. Kantralor prosta adklučaje mahčymaść terminova apłacić prajezd pry pačatku pravierki apłaty.
Ahułam za paŭhoda ŭ Minsku była aštrafavanaja amal 51 tysiača čałaviek. Za prajezd dahetul nie płaciać kala 13% pasažyraŭ, jašče 7% płaciać raz-poraz.
Razam z vyviadzieńniem sa štatu «Minsktransa» kanduktaraŭ amal udvaja pavialičyłasia kolkaść kantraloraŭ, padvysiłasia intensiŭnaść pravierak. Pravy i abaviazki apošnich nie źmianilisia, ale pradpryjemstva prapracoŭvaje pytańnie ab bolš ciesnaj supracy ź milicyjaj dziela zabieśpiačeńnia paradku na transparcie.
Ministerstva transpartu rychtuje pavieličeńnie štrafaŭ za bieźbiletny prajezd i ŭzmacnieńnie adkaznaści za pravaparušeńni na transparcie.
Mahčymyja źmieny pradstaŭnik «Minsktransa» nie prakamientavała, ale adznačyła, što pradpryjemstva nie raz prapanoŭvała ministerstvu pavialičyć štraf z 0,5 bazavaj vieličyni (siońnia 90 tysiač rubloŭ) da 1 bazavaj vieličyni, a kantraloram dać prava administracyjnaha zatrymańnia bieźbiletnikaŭ.
Akupalnaść transpartu za pieršyja 5 miesiacaŭ hetaha hoda pavysiłasia: na 2,2% na tramvajach, na 3,6% na tralejbusach, na 8,2% na aŭtobusach, ahułam — na 6,6%. Ale da poŭnaj akupalnaści daloka: sabiekošt prajezdu składaje kala 9400 rubloŭ, a zvyčajny kvitok kaštuje 4500.
Siońnia «Minsktrans» analizuje ideju dyviersifikacyi apłaty prajezdu ŭ horadzie ŭ zaležnaści ad dalnaści (dalej jedzieš — bolš płaciš). Takaja sistema ŭžo dziejničaje ŭ pryharadnych maršrutach, ale dla jaje ŭviadzieńnia ŭ horadzie pakul niedastatkova źviestak pa pajezdkach karystalnikaŭ bieskantaktnych kartak.
Čytajcie taksama: U Minsku validatar kaštuje daražej za iPhone — 727 dołaraŭ, u tendary ŭdzielničali dźvie rodnasnyja kampanii
