Nieviadomyja źniščyli voziera płoščaj 1,1 hiektara pablizu vioski Lisičnik Bychaŭskaha rajona razam z usioj rybaj.
Jak paviedamili ŭ Bychaŭskaj mižrajonnaj inśpiekcyi achovy žyviolnaha i raślinnaha śvietu, terytoryju vadajoma, jaki znachodzicca ŭ fondzie zapasu rybałoŭnych uhodździaŭ i adkul vyjšła ŭsia vada, vyjavili rabotniki inśpiekcyi 8 lipienia.
Fota: «Majak Prydniaproŭja»
«Hibiel aziorna-račnoj ryby zdaryłasia ŭ vyniku razbureńnia damby i aparažnieńnia vadajoma nieviadomymi asobami. Padčas abśledavańnia vadajoma byli znojdzienyja 2072 zahinułyja karasi siarebranyja. U vyniku supraćpraŭnych dziejańniaŭ nieŭstanoŭlenych asob navakolnamu asiarodździu naniesieny ŭron u 2072 bazavych vieličyń (373 młn rubloŭ)», — skazali ŭ mižrajonnaj inśpiekcyi, zaznačyŭšy, što taki ŭron źjaŭlajecca asabliva bujnym.
Nieviadomyja, jakija razburyli dambu, paviedamili miascovym žycharam, što vykupili voziera i majuć namier pašyryć jaho płošču da 5 ha, paviedamiła staršynia Śledziukoŭskaha sielsavieta Žanna Kiryłava.
«Technikaj abkasili i źbiralisia niešta rabić. Vioska vymirajučaja, krajniaja. Ale ŭsio-taki miascovyja žychary nieabyjakavyja, choć miascovyja babulki i spałochalisia, ale ich dzieci padniali šum, i vielmi pravilna zrabili. Kali my tudy pryjechali, stajała śpiakota, niejmavierny pach i vielmi šmat zahinułaj ryby. Adrazu pryjechała inśpiekcyja, vyklikali śledčyja orhany», — zaznačaje staršynia sielsavieta.
Pavodle jaje słoŭ, na voziera, jakoje znachozicca na ziemlach SPK «Śledziuki», užo pakłali voka niejkija ludzi. «Dvojčy da nas u sielvykankam źviartalisia, pytalisia, jak heta voziera možna ŭziać u arendu, ale my ludziam adrazu admovili, skazali, što na zakonnych padstavach — nijak, tamu što my da hetaha voziera nijakich adnosin nie majem. I ŭ arendu, na žal, nie našaj siesii rašeńniem, a na ŭzroŭni rajona pytańnie vyrašajecca», — skazała Kiryłava.
Staršynia sielsavieta hublajecca ŭ zdahadkach, dla čaho było źniščana voziera i zahublena ryba, bo brakańjerstva ŭ hetym vypadku nie vidavočnaje.
Jak paviedamili va USK Mahiloŭskaj vobłaści, pa hetym fakcie sprava pakul nie raspačataja, pravierku pravodzić Bychaŭski RAUS.
