Dakumienty na rehistracyju svaich inicyjatyŭnych hrup u Centrvybarkam padali ŭžo dzieviać pretendentaŭ na pasadu prezidenta Biełarusi.
Pieršaj 14 lipienia dakumienty na rehistracyju ŭ CVK padała inicyjatyŭnaja hrupa dziejnaha kiraŭnika dziaržavy Alaksandra Łukašenki. U jaho hrupie — 10,5 tysiačy čałaviek, uznačalvaje jaje staršynia Fiederacyi prafsajuzaŭ Biełarusi Michaił Orda.
15 lipienia dakumienty na rehistracyju ŭ CVK padali staršyni Biełaruskaj partyi levych «Spraviadlivy śviet» Siarhiej Kalakin i Libieralna-demakratyčnaj partyi Siarhiej Hajdukievič.
Hrupu Kalakina ŭznačaliŭ namieśnik staršyni partyi «Spraviadlivy śviet» Valeryj Uchnaloŭ, u jaje ŭvachodziać 1 tysiača 513 čałaviek.
Inicyjatyŭnaj hrupaj Siarhieja Hajdukieviča kiruje namieśnik staršyni ŁDP Anatol Chiščanka, u skład hrupy ŭvajšli 2,5 tysiačy čałaviek.
16 lipienia ŭ CVK pastupili dakumienty ad inicyjatyŭnych hrup adrazu šaści pretendentaŭ na pasadu prezidenta — biźniesmiena z Navapołacka Andreja Kanaŭca; aktyvistki kampanii «Havary praŭdu» Taćciany Karatkievič, jakaja vyłučajecca ad kaalicyi «Narodny refierendum»; staršyni Abjadnanaj hramadzianskaj partyi Anatola Labiedźki; lidara arhkamiteta Biełaruskaj sacyjał-demakratyčnaj partyi (Narodnaja Hramada), eks-kandydata ŭ prezidenty na vybarach 2010 hoda, palitźniavolenaha Mikałaja Statkieviča; Žanny Ramanoŭskaj i Iryny Pieršynaj.
U skład inicyjatyŭnaj hrupy Kanaŭca ŭvajšli 100 čałaviek — patrabavany Vybarčym kodeksam minimum, uznačaliŭ hrupu Dźmitryj Pilipčuk.
U hrupie Karatkievič — bolš za 1 tysiaču 900 čałaviek, uznačalvaje jaje kiraŭnik kampanii «Havary praŭdu» Andrej Dźmitryjeŭ.
Tysiača čałaviek uvajšła ŭ inicyjatyŭnuju hrupu Labiedźki, jakuju ŭznačaliŭ člen palitsavieta AHP Viktar Karniajenka.
U inicyjatyŭnuju hrupu Statkieviča ŭvachodziać bolš za 1,7 tysiačy čałaviek, uznačalvaje jaje žonka źniavolenaha palityka Maryna Adamovič.
Inicyjatyŭnuju hrupu Ramanoŭskaj uznačalvaje Jaŭhien Naporka, Pieršynaj — Maryja Chramcova. Bolš pra hetych pretendentak pakul ničoha nieviadoma.
Pryjom dakumientaŭ na rehistracyju inicyjatyŭnych hrup ad pretendentaŭ na pasadu prezidenta zaviaršajecca 17 lipienia.
Akramia vyšejnazvanych pretendentaŭ pra svoj namier bałatavacca na vyšejšuju dziaržaŭnuju pasadu zajavili: Juryj Radźkoŭ — dyrektar kampanii «Car-miod», aŭtar mižnarodnaha prajekta «Śviet miodu i zdaroŭja»; Uładzisłaŭ Citovič — hiendyrektar kampanii Veduus, eks-kandydat u deputaty Pałaty pradstaŭnikoŭ Nacyjanalnaha schodu na vybarach 2012 hoda; Viktar Ciareščanka — ekanamist, eks-kandydat u prezidenty na vybarach 2010 hoda.
Pra prezidenckija ambicyi zajaŭlaŭ taksama Juryj Šulhan — biespracoŭny, jakoha padtrymała Biełaruskaja partyja «Zialonyja», adnak 16 lipienia jon zajaviŭ pra vychad ź pieradvybarnaj honki.
Prezidenckija vybary ŭ Biełarusi pryznačanyja na 11 kastryčnika.
