Ukraina značna macniejšaja, čym mnohija ličać, piša były bajavy aficer amierykanskaj armii Adryjan Bonienbierhier u artykule na sajcie viadomaha časopisa Forbes.
Dahetul ukraincy trymajuć značnuju častku armii ŭ reziervie na toj vypadak, kali Rasija nakiruje na Danbas dadatkovyja siły rehularnaj armii. Kali ŭ minułym žniŭni ŭkrainskaja armija viała nastup suprać bajevikoŭ, jana pastaviła «DNR» i «ŁNR» na miažu vajennaha krachu, i tolki dapamoha rasijskaj armii zmahła ŭratavać hetyja psieŭdaniezaležnyja ŭtvareńni.
Z taho času linija frontu stała adnosna stabilnaj, adnak sutyčki i abstreły praciahvajucca kožny dzień, kožny dzień abodva baki niasuć straty, piša Bonienbierhier, jaki ŭdzielničaŭ u vajennych dziejańniach u Afhanistanie.
Ukrainskija nacyjanalnyja hvardziejcy i amierykanskija žaŭniery na palihonie ŭ Javaryvie, viasna 2015 hoda. Fota newssky.com.ua
Mnohija na Zachadzie ličać, što Rasija moža ŭ luby čas parušyć hetaje status-kvo, prabicca praz ukrainskija abarončyja pazicyi, dajści da Kijeva, Adesy i navat dalej. Adpaviedna ličycca, što Ukraina absalutna niazdolnaja abaranicca ad Maskvy i trymajecca tolki tamu, što RF pakul nie adpraŭlała ŭ boj dastatkova vialikich sił.
Adnak ź inšaha boku, Ukraina ŭvieś čas umacoŭvaje svaju abaronu, treniruje armiju, a nasielnictva ŭsio bolš asacyjuje svoj los ź losam dziaržavy.
Bonienbierhier, jaki paśla słužby ŭ 173 amierykanskaj pavietrana-desantnaj bryhadzie staŭ žurnalistam, pravioŭ tydzień u ŭkrainskim Javaryvie, dzie padraździaleńni jak raz hetaj bryhady trenirujuć adzinki Nacyjanalnaj hvardyi Ukrainy.
Pa jahonych słovach, jon byŭ uražany zdolnaściu ŭkrainskich žaŭnieraŭ vučycca: ich taktyčnyja navyki stali nie horšymi, čym u bolšaści amierykanskich bajavych častak.
Ukrainskija tanki na vyprabavańniach u Žytomirskaj vobłaści. Fota newssky.com.ua
«Amal siem hod ja słužyŭ aficeram (u tym liku dva hady ŭ Afhanistanie), i kali ja treniravaŭ afhanskuju palicyju i žaŭnieraŭ, ja nie bačyŭ ničoha padobnaha», — piša aŭtar.
«Ja čuŭ, jak stralaje artyleryja i tanki — ukrainskija artylerysty treniravalisia vajavać razam ź piachotaj i braniatechnikaj, jakija pavinny chutka i dakładna atrymlivać dapamohu z boku minamiotaŭ i harmat. Jany ŭžo stali častkaj adzinaj armii, jakaja pracuje pa pryncypach zdolnaści i arhanizavanaści, a nie reliktam savieckaha času», — dadaje Bonienbierhier.
U vyniku źjaŭlajecca varyjant, pra jaki nichto nie dumaje ani na Zachadzie, ani ŭ Rasii — praz rasijskuju samaŭpeŭnienaść, praz zvyčku ličyć ukrainskuju armiju niazdolnymi niebarakami Ukraina moža nanieści niečakany ŭdar pa rasijskich maryjanietkach i razhramić ich.
Navat kali sami ŭkrainskija vajskoŭcy hetaha jašče nie razumiejuć, moža atrymacca tak, što sutyknieńnie novaj ukrainskaj armii z častkami «DNR-ŁNR» pryviadzie «Navarosiju», jakaja schilnaja prynižać i niedaaceńvać praciŭnika, da vajennaj parazy.
Vučeńni na Javaryŭskim palihonie. Fota akcent.org.ua
«Rasija znachodzicca ŭ vielmi chistkim stanoviščy. Čym daŭžej jana čakaje, tym bolš imaviernaść taho, što jaje siły ŭ Danbasie ryzykujuć atrymać katastrofu, niečuvanuju z Druhoj suśvietnaj vajny — akružeńnie i źniščeńnie cełaha bajavoha złučeńnia. Z kožnym tydniem ukrainskaja armija macnieje i robicca bolš upeŭnienaj u svaich siłach. Z kožnym tydniem rasiejskija žaŭniery i aficery bolš vierać u svaje siły i ŭ słabaść i słaby maralny duch ukraincaŭ», — piša vieteran.
U vyniku składvajecca situacyja, pry jakoj nie Rasija źniščaje ŭkrainskuju armiju, a Pucin vymušany iści na radykalnyja miery, kab uratavać toje, što jašče zastaniecca ad «Navarosii» i navat spynić nastup ukraincaŭ na susiednija rasiejskija rehijony.
Zrešty, čamu ŭkraincy pavinny spyniacca na svaich miežach, kali Rasija zajmaje ŭkrainski Krym? — zadajecca rytaryčnym pytańniem aŭtar. Da taho ž niečakanaja paraza ad praciŭnika, jaki ličyŭsia słabym, moža mieć vielmi drennyja nastupstvy dla bajavoha ducha ŭsioj rasijskaj armii.
«Ja spadziajusia, što zachodnija dypłamaty dapamohuć Pucinu ŭbačyć, nakolki varjackaj jość jahonaja palityka ŭ Ukrainie, i čym chutčej heta adbudziecca, tym lepiej, bo čym daŭžej jon zastajecca na ŭkrainskaj terytoryi, tym bolš šansaŭ na toje, što jon atrymaje prynižalnuju parazu», — adznačaje Bonienbierhier.
Takaja paraza i chvaravitaja reakcyja na jaje ŭ Kramli mohuć być nastolki niebiaśpiečnymi, što pahroza Treciaj suśvietnaj vajny padymiecca da ŭzroŭniu, niabačanaha z časoŭ Karybskaha kryzisu.
