Fota: Iryna Arachoŭskaja via Instagram
Zbor podpisaŭ za kandydaty ŭ prezidenty startavaŭ 23 lipienia. Adzin sa zdymkaŭ staŭ žvava raźlatacca pa internecie: za Łukašenku niby źbirajuć podpisy pad bieł-čyrvona-biełym ściaham. «Naša Niva» pryhadała inšyja pieradvybarčyja kurjozy minułych hadoŭ.
Fota: NN.BY
Napeŭna, hałoŭnym fota minułaj vybarčaj kampanii stała «Komiedija «Snova ty»». U 2010 hodzie podpisy za Łukašenku źbirali pad kinateatram «Pieramoha». Na fonie zborščykaŭ podpisaŭ krasavałasia afiša kamiedyi «Znoŭ ty». Alaksandr Łukašenka tady išoŭ na čaćviorty termin. Paśla taho, jak fota pralacieła pa internecie, kurjoz zaŭvažyli i zborščyki podpisaŭ — i stali źbirać podpisy pad płakatam «Obitiel zła».
Darečy, zborščykam podpisaŭ sioleta taksama varta być aściarožnymi: u kino padčas kampanii pakažuć filmy «Mińjony», «Čałaviek-muraška», «Dziadula majoj mary», «Iracyjanalny čałaviek», «Kakoša — maleńki drakoša», «Misija nievykanalnaja: Vyhnancy»…
Fota: A. Petrowitsch, Deutsche Welle
Paźniej, u 2012 hodzie niaŭdałaje (ci ŭdałaje?) susiedstva pieradvybarčaj ahitacyi paŭtaryłasia. Tady cikavuju kambinacyju płakataŭ napiaredadni deputackich vybaraŭ zaŭvažyŭ karespandent Deutsche Welle.
Fota: Anton Matolka, toxaby.livejournal.com
Taksama pierad vybarami 2010 hoda pa internecie chadziła i inšaje «fota-miem». Pašancavała fatohrafu Antonu Matolku. Jon apisvaŭ hety zdymak tak: «Ubačyŭ tolki la HUMa. Padyšoŭ, dastaŭ fotazdymač — i adrazu ž mužyk padbieh. «Davaj, — kaža, — ja tabie jaho pacałuju». I całuje try razy. Nie pastanoŭka, praŭda».
Fota: Alaksandr Arsionaŭ
Aŭtaru hetych radkoŭ paščaściła mieniej: pry sprobie źniać toj ža pikiet na abaronu pryvatnaści zborščykaŭ podpisaŭ ustaŭ nieviadomy.
Samym jaskravym momantam pieradvybarčaj kampanii-2006 možna nazvać nie fota, a videa: tady prasłaviłasia pieśnia «Słušaj Baťku» ŭ vykanańni ansamblu «Siabry». Varta adznačyć, što aŭtar muzyki da pieśni nazvaŭ paźniejšy ahit-chit «Sania ostanietsia s nami» «niesuśvietnaj hidotaj».
Kadr z televystupu vystupu Alaksandra Kazulina
Hałoŭnym «fotafejłam» ahitacyi pierad prezidenckimi vybarami 2006 hoda možna nazvać pieradavicu «Sovietskoj Biełoruśsii» za 18 lutaha. «Vybirać nam», — kazaŭ vialiki nadpis na fota z Alaksandram Łukašenkam i Lidzijaj Jarmošynaj (artykuł pad takim zahałoŭkam zachavaŭsia ŭ archivie SB). Ci miełasia na ŭvazie pad «nam», što abirać budzie narod, ci fraza prypisvałasia ludziam na fota, nieviadoma. Hety numar haziety staŭ na niadoŭhi čas łakalnym miemam, na jaho źviarnuŭ uvahu ŭ svaim televystupie kandydat Alaksandr Kazulin (jamu nie spadabałasia).
Fota: bymedia.net
A z vybarčaj kampanii-2001 najbolš zapaminalnym epizodam možna nazvać tancy sa źmiejami. Fota z roznych rakursaŭ zachavalisia ŭ bymedia.net. Mahčyma, tady heta ŭsprymałasia davoli pazityŭna, ale ŭžo praz šeść hod lohkaja erotyka na palityčnych akcyjach stała miemam z chutčej niehatyŭnym adcieńniem.
Fota z sajta belaruspartisan.org
Ź pieršych ža prezidenckich vybaraŭ Biełarusi samyja papularnyja fota — Łukašenka pad bieł-čyrvona-biełym ściaham, pobač z «Pahoniaj». Kurjozam heta nie nazavieš: tady jany byli aficyjnymi simvałami Biełarusi. Klatva Łukašenki słužyć narodu Biełarusi, pramoŭlenaja pa-biełarusku pad bieł-čyrvona-biełym ściaham, zachavałasia i na videa.
Fota z sajta politforums.net
Heta potym Łukašenka pad «Pahoniaj» staŭ usprymacca jak kurjoz. Na pačatku 90-ch ža pad «Pahoniaj» stajaŭ i Bił Klintan. A Łukašenka — pad zorna-pałasatym.
Fota z padborki tut.by
Siońnia ž cikaviej hladziacca nie niejkija kurjozy, a surjoznyja hazietnyja pałosy 1994 hoda.
***
Pryhadali inšyja viasiołyja pieradvybarčyja karcinki? Padzialiciesia imi ŭ kamientarach!
