Z 26 lipienia ŭ VNU Biełarusi budzie ažyćciaŭlacca dadatkovy nabor na miescy, jakija zastalisia vakantnymi ŭ dzionnaj biudžetnaj formie paśla asnoŭnaha naboru. Pra heta havorycca na partale Ministerstva adukacyi.
Infarmacyja ab najaŭnaści vakantnych miesc pa śpiecyjalnaściach raźmieščana na sajtach VNU. Pryjom dakumientaŭ dla hramadzian Respubliki Biełaruś — z 26 pa 28 lipienia. Zaličeńnie projdzie 29 lipienia.
Ministr adukacyi Michaił Žuraŭkoŭ, padvodziačy papiarednija vyniki ŭstupnaj kampanii na biudžet, padkreślivaŭ «Hety hod adznačany prychodam abituryjentaŭ z bolš vysokimi bałami siertyfikataŭ pa centralizavanym teściravańni, što značna pavysiła ŭzrovień konkursnaj situacyi». Tak, pa tradycyjna vysoka zapatrabavanych śpiecyjalnaściach prachadnyja bały byli značna vyšejšyja za minułahodnija. Naprykład, pa śpiecyjalnaściach «mižnarodnyja adnosiny» (BDU) prachadny bał skłaŭ 378 (u 2014 hodzie — 364), «mižnarodnaje prava» (BDU) — 383 (u 2014 hodzie — 369).
Pry hetym ministr dadaŭ, što jość niekalki VNU, dzie pa vynikach padačy zajaŭ pakul nazirajecca niedabor u 1-3 biudžetnyja miescy. Nijakich śpiecyjalnych zahadaŭ nie budzie — paradak i ałharytm praviadzieńnia dadatkovaha naboru vyznačany zahadzia i viadomy kiraŭnikam ustanoŭ adukacyi. Studentaŭ na dadatkovy nabor čakajuć Viciebski dziaržaŭny technałahičny ŭniviersitet, Homielski dziaržaŭny techničny ŭniviersitet imia P.V. Suchoha, Biełaruskaja dziaržaŭnaja sielskahaspadarčaja akademija, Mahiloŭski dziaržaŭny ŭniviersitet imia A.A. Kulašova i niekalki inšych VNU.
Ab svaim rašeńni pravodzić dadatkovy nabor rektary VNU paviedamili praz aficyjny sajt ustanovy adukacyi, pryjomnuju kamisiju, u srodkach masavaj infarmacyi.
