Kiraŭnik francuzskaj delehacyi Ćjery Maryjani (treci źleva) ŭ Simfieropali, fota TASS
Krymski refierendum dazvoliŭ paźbiehnuć paŭtareńnia ŭkrainskaha scenara na paŭvostravie, zajaviŭ deputat Nacyjanalnaha schodu Francyi Ćjery Maryjani padčas naviedvańnia Kryma, pieradaje TASS.
Pa słovach Maryjani, dva miesiacy tamu jon byŭ na Danbasie i z «žacham naziraŭ razbureńni i pakuty ludziej».
«Paśla taho, što my pačuli, my zrazumieli, što viartańnie Kryma Rasii — heta zakanamierna. Kab pierałamać vobraz, što ŭžo skłaŭsia, patrebny čas, ale ja abiacaju, što my daniasiem da ŭsich realnuju situacyju ŭ Krymie. Kali hučać dva zvany, ludzi pačynajuć zadumvacca. Kryzis sielskaj haspadarki praz sankcyi ŭžo pakłaŭ pačatak hetamu pracesu», — skazaŭ Maryjani paśla naviedvańnia sievastopalskaj Panaramy.
Člen Nacyjanalnaha schodu Francyi Žak Mijar ličyć, što supiarečnaści pamiž Rasijaj i Francyjaj nie majuć sensu ŭ kantekście ahulnaj historyi krain.
«Siońniašniaja situacyja supraćstajańnia nie maje sensu i nie ŭpisvajecca ŭ ahulnuju historyju Rasii i Francyi. Treba jak maha chutčej pačynać supracoŭnictva i budavać śviet salidarnaści. Kultura, jakaja nas abjadnoŭvaje, budzie alternatyvaj kanfliktaŭ. My naviedali Panaramu, jakuju napisaŭ francuzski mastak Franc Rubo, jaki ličyŭ siabie ruskim», — skazaŭ jon.
Miž tym francuzski sienatar Iŭ Poca dy Borha, jaki razam ź inšymi kalehami znachodzicca ŭ Krymie, aktyŭna kuplaje miascovyja suvieniry, paviedamlaje »Ukrainskaja praŭda».
U pryvatnaści, francuzskaje vydańnie Le Parisien raźmiaściła fota sienatara z futbołkaj, na jakoj prezident RF Uładzimir Pucin šepča prezidentu ZŠA Baraku Abamu na vucha: «Abama, ty čmo».
Sa spasyłkaj na rasijski LifeNews francuzskaje ŚMI paviedamlaje, što suvienir dy Borha kupiŭ, špacyrujučy pa nabiarežnaj Sievastopala. «Vidać, rasiejcy Kryma palubiać sienatara», — iranizuje vydańnie.
«Vice-prezident franka-rasijskaj hrupy družby ŭ Sienacie horda paziravaŭ z futbołkaj. Rasiejskija ŚMI atrymlivajuć asałodu», — havorycca ŭ materyjale.
Jak paviedamlałasia, hrupa prarasiejskich francuzskich deputataŭ zajaviła ab namiery pajechać u Rasiju i anieksavany Krym. Bolšuju častku francuzskaj delehacyi skłali deputaty ad partyi eks-prezidenta Francyi Nikala Sarkazi «Respublikancy».
U toj ža čas MZS Ukrainy papiaredziŭ francuzskich deputataŭ pra mahčymuju zabaronu na ŭjezd na terytoryju Ukrainy ŭ vypadku pajezdki na akupavany paŭvostraŭ. Vizit deputataŭ asudzili i ŭ MZS Francyi, nazvaŭšy jaho parušeńniem mižnarodnaha prava.
