Brescki abłasny sud 24 lipienia pakinuŭ biez zadavalnieńnia kasacyjnuju skarhu palitviaźnia Juryja Rubcova na prysud suda Pružanskaha rajona. Pra heta BiełaPAN paviedamiła žonka źniavolenaha — Jadviha Rubcova.

Pavodle jaje słoŭ, pakul nieviadoma, u jakuju kałoniju etapujuć Rubcova dla adbyćcia pakarańnia. «Heta stanie viadoma ad advakata, jakaja siońnia da jaho pajechała», — paviedamiła Jadviha Rubcova. Samoha palitviaźnia z Baranavickaha SIZA, dzie jon znachodzicca paśla vyniasieńnia prysudu sudom Pružanskaha rajona, u Brest nie pryvozili.

Jury Rubcoŭ, 53-hadovy hramadski aktyvist z Homiela, viadomy tym, što ŭdzielničaŭ u Minsku ŭ vuličnych akcyjach apazicyi ŭ majcy z nadpisam «Łukašenka, sychodź». U kastryčniku 2014 byŭ pryznany vinavatym u abrazie sudździ Kiryły Pałulecha, jaki vioŭ jaho administracyjny praces paśla akcyi apazicyi «Čarnobylski šlach». Rubcova tady prysudzili da dvuch z pałovaj hadoŭ abmiežavańnia voli z nakiravańniem u vypraŭlenčuju ŭstanovu adkrytaha typu, adnak z ulikam amnistyi realny termin pakarańnia jamu byŭ skaročany da paŭtara hoda.

Adbyvajučy pakarańnie, Rubcoŭ admaŭlaŭsia pracavać z-za nizkaj zarpłaty i patrabavaŭ zabiaśpiečyć jaho pracaj ź siaredniaj zarpłataj pa krainie (600 dalaraŭ u ekvivalencie), što stała padstavaj dla zaviadzieńnia novaj kryminalnaj spravy. Čakajučy suda, Rubcoŭ kala paŭtara miesiaca trymaŭ haładoŭku. Jon taksama zrabiŭ sabie na hrudziach tatuiroŭku — nadpis «Łukašenka, sychodź», jakuju prademanstravaŭ sudu ŭ chodzie słuchańniaŭ, ahaliŭšysia pa pojas. 28 maja sud Pružanskaha rajona prysudziŭ Rubcova da dvuch hadoŭ pazbaŭleńnia voli ŭ kałonii ahulnaha režymu.

U červieni pravaabarončaja arhanizacyja «Mižnarodnaja amnistyja» pryznała Juryja Rubcova viaźniem sumleńnia i paviedamiła, što maje namier damahacca ad uładaŭ Biełarusi jaho vyzvaleńnia. 1 lipienia, pratestujučy suprać umoŭ utrymańnia ŭ SIZA, Rubcoŭ pačaŭ novuju haładoŭku.

Клас
0
Панылы сорам
0
Ха-ха
0
Ого
0
Сумна
0
Абуральна
0