Kamunistyčnaja partyja Ukrainy nie moža być subjektam palityčnaha pracesu i ŭdzielničać u miascovych vybarach.

Pra heta zajaviŭ na bryfinhu ministr justycyi Pavieł Piatrenka.

UNIAN

UNIAN

«Ja padpisaŭ zahady, pravavym nastupstvam jakich źjaŭlajecca toje, što hetaja palityčnaja siła i inšyja kamunistyčnyja partyi ź siońniašniaha dnia nie mohuć być subjektam vybarčaha pracesu i nie mohuć udzielničać u miascovych, ahulnadziaržaŭnych i prezidenckich vybarach», — skazaŭ ministr.

Adkazvajučy na pytańnie, ci skasavanaja rehistracyja KPU i inšych kamunistyčnych partyj, Piatrenka adznačyŭ, što, zhodna z zakonam ab dekamunizacyi, KPU hublaje status udzielnika vybarčaha pracesu.

Pa słovach ministra, KPU zastajecca ŭ statusie jurydyčnaj asoby da momantu, pakul sud nie skasuje rehistracyju. «To bok, heta ŭžo techničnaje pytańnie», — dadaŭ jon.

Piatrenka padkreśliŭ, što paśla pryniaćcia zakonaŭ ab dekamunizacyi Ministerstva justycyi sfarmavała niezaležnuju kamisiju, jakaja pravodziła pravierku na adpaviednaść troch kamunistyčnych partyj va Ukrainie — KPU, Kampartyi (abnoŭlenaj) i Kamunistyčnaj partyi rabočych i sialan. «Na padstavie pracy kamisii byli ŭchvalenyja vysnovy, jakija zhodna z zakonam byli pradstaŭlenyja Ministerstvu justycyi dla pryniaćcia kančatkovaha rašeńnia», — skazaŭ ministr.

«Ja padpisaŭ try zahady, jakija pryznajuć, što kampartyi Ukrainy ŭ svajoj dziejnaści, najmieńni, u simvolicy, u statucie, u prahramie nie adpaviadajuć patrabavańniam č.2 st.3 zakona «Ab asudžeńni kamunistyčnaha i nacyjanał-sacyjalistyčnaha (nacysckaha) tatalitarnaha režymaŭ va Ukrainie i zabaronie prapahandy ich simvoliki», — adznačyŭ Piatrenka.

Siońnia, 24 lipienia, sakratar Savieta nacyjanalnaj biaśpieki i abarony Ukrainy Alaksandr Turčynaŭ nazvaŭ pazbaŭleńnie Kamunistyčnaj partyi Ukrainy i inšych kamunistyčnych partyj prava być subjektam palityčnych i vybarčych pracesaŭ aktam histaryčnaj spraviadlivaści.

Lidar KPU Piatro Simanienka zajaviŭ, što Kamunistyčnaja partyja voźmie ŭdzieł u miascovych vybarach, jakija projduć 25 kastryčnika.

«Kamunistyčnaja partyja Ukrainy isnuje i budzie isnavać. Tamu my, naturalna, hatovyja, u nas jość kanceptualnaja i zaćvierdžanaja stratehija ŭdziełu Kampartyi ŭ vybarach», — skazaŭ Simanienka i dadaŭ, što KPU maje namier vyłučać svaich kandydataŭ na mažarytarnych akruhach u vypadku, kali partyju zabaronić sud.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?