Foto: CHARTER97.ORG
Ideja praviadzieńnia antyimpierskaha fiestyvalu naležyć hurtu Brutto. Jak paviedamlaje budzma.by, skład udzielnikaŭ taksama vybirali ŭdzielniki kamandy. Na scenie art-zavoda «Płatforma» vystupiać hurty Dzieciuki ź Biełarusi, Antis ź Litvy, «Televizar» z Rasiei, «Hajdamaki» z Ukrainy i ŭłasna zasnavalniki fiestyvalu.
«Heta nie čarhovy fiestyval ježy abo seksu, jakija apanavali prastoru. Hety fiestyval — antyimpierski i antyvajenny. Jon abjadnoŭvaje ŭsich, chto vystupaje suprać novaj chałodnaj vajny. Chto małady, chto lubić sport, choča być mocnym, advažnym i volnym ducham», — adznačaje pradziusar hurta Brutto Anton Aziźbiekian.
Brutto navažylisia pravieści takuju maštabnuju akcyju, kali zrazumieli, što ich idei prymaje vialikaja kolkaść ludziej. Padčas hastrolaŭ jany sustreli niamała hurtoŭ, blizkich im pa duchu. Tamu i zasnavali fiestyval, jaki nazyvajuć «terytoryjaj, na jakoj usim dajecca svaboda dumać, tvaryć i havaryć toje, što ŭvažajuć za pravilnaje».
Pavodle zadumy zasnavalnikaŭ «Partyzan-roku», jon pavinien stać tradycyjnym i pierasoŭnym. Pieršy fiestyval vyrašyli pravieści va Ukrainie. Nastupny miarkujecca zładzić u Litvie.
«My chočam, kab «Partyzan-rok» staŭ fiestyvalem, jaki možna sustreć u lubym miescy śvietu. Ciapier jon najbolš patrebien va Ukrainie. Potym budzie Litva, a mahčyma, praź niekatory čas projdzie i ŭ Biełarusi», — adznačyŭ pradstaŭnik Brutto.
Nazvu fiestyval atrymaŭ pavodle adnajmiennaha sinhłu-łozunhu Brutto, pad jakim u hetym hodzie prachodziŭ tur kamandy Siarhieja Michałka pa Ukrainie.
Jašče adnym biełaruskim hurtam na pieršym fiestyvali «Partyzan-rok» u Kijevie buduć Dzieciuki — majstry fantastyčna viasiołaha fołk-panku z Harodni. Muzyki pryśviačajuć svaje pieśni biełaruskim hierojam roznych časoŭ i raspaviadajuć pra historyju krainy. U 2014 hodzie jany atrymali premiju «Hieroi hoda» ad partała Tuzin.fm.
Adna z prykmietnaściaŭ fiestyvalu — vystup litoŭskaha hurta Antis na čale z Alhierdam Kaŭšpiedasam — adnym ź lidaraŭ ruchu «Sajudzis», jaki ŭznačaliŭ kaliści praces vychadu Litvy sa składu SSSR. U druhoj pałovie 90-ch Antis uvažaŭsia za ŭvasableńnie litoŭskaj niefarmalnaj sceny i ździŭlaŭ słuchačoŭ va ŭsim śviecie svaimi varjackimi teatralizavanymi šou ŭ duchu «The Wall» Pink Floyd. Adnaviŭ dziejnaść hurt u 2007 hodzie — praz 17 hadoŭ (!) paśla raspadu i ciapier paśpiachova hastraluje.
Jašče adna lehienda z 80-ch — rasiejski hurt «Televizar» z Michaiłam Barzykinym na čale. Michałok nieadnarazova vykazvaŭsia ab svaim nieprymańni takoj źjavy, jak «rasiejski rok», ale hetuju kamandu adroźnivaje ad bolšaści jaje pradstaŭnikoŭ vyrazna akreślenaja hramadzianskaja pazicyja i vytančanaść aranžyrovak. Ich pieśni zabaraniali jak padčas pierabudovy, tak i padčas kiravańnia Pucina. «Televizar» vystupaŭ u traŭni ŭ Kijevie i vykanaŭ svaju novuju pieśniu — «Ty prabač nas, Ukraina».
Jašče adny ŭdzielniki fiestyvalu — Haydamaky z Ukrainy, jakich pradstaŭlajuć jak «muzyčnuju farmacyju ź jeŭrapiejskimi pohladami». Hetyja muzyki — zaciatyja prychilniki sučasnaj rok- i world-music i sintezujuć u svajoj tvorčaści rok, dab, pank, ska, zamiašany na ŭkrainskim fołku i bałkanskich matyvach.
Fiestyval «Partyzan-rok» projdzie 29 žniŭnia ŭ Kijevie. Košt kvitkoŭ na kancert pačynajecca z 249 hryŭniaŭ (blizu 9 jeŭraŭ).
