Na 1 lipienia za biełarusami ličylisia bankaŭskija kredyty na ahulnuju sumu ŭ 64,7 tryljona rubloŭ. Pra heta paviedamlajecca ŭ biuleteni bankaŭskaj statystyki, raźmieščanym na sajcie Nacbanka. Atrymlivajecca, što ŭ pieraliku na kožnaha žychara Biełarusi prypadaje pa 6,8 miljona rubloŭ pazyk pierad bankami.
Pa dadzienych na 1 lipienia lidaram siarod rehijonaŭ pa ahulnaj sumie vydadzienych kredytaŭ dla fizičnych asob staŭ Minsk — 20,4 tryljona rubloŭ, aŭtsajdaram — Mahiloŭskaja vobłaść (5,9 tryljona). Pry hetym kredytnaja zapazyčanaść žycharoŭ stalicy ŭ paraŭnańni z pačatkam hoda skaraciłasia bolš čym na 500 miljardaŭ rubloŭ. U astatnich rehijonach hety pakazčyk pavialičvajecca.
Na pačatak lipienia kredytnaja zapazyčanaść fizičnych asob u nacyjanalnaj valucie skłała 63,9 tryljona rubloŭ. Hety pakazčyk amal na 1,7 tryljona bolšy, čym na pačatak hetaha hoda. Rost zapazyčanaści pa kredytach, vydadzienych bankami fizičnym asobam u nacyjanalnaj valucie, adznačany va ŭsich abłaściach, akramia horada Minska i Minskaj vobłaści (źnižeńnie na 0,02%).
Pry hetym suma pazyk pa kredytach u zamiežnaj valucie praciahvaje skaračacca: z 64 miljonaŭ dalaraŭ na 1 studzienia da 55,7 miljona na pačatak lipienia.
Z pačatku hoda bolš čym u 1,2 raza vyrasła dola prablemnaj zapazyčanaści pa kredytach fizičnych asob: z 448 miljardaŭ rubloŭ na pačatak studzienia da 544,9 miljarda na 1 lipienia. Bolš za pałovu hetaj sumy ličycca za minčukami, jakija na pačatak hetaha miesiaca nie zmahli svoječasova vypłacić 219,4 miljarda rubloŭ. Samyja dyscyplinavanyja ŭ płanie svoječasovaha pahašeńnia kredytaŭ žychary Bresckaj vobłaści, na 1 lipienia za imi značyłasia prablemnaja zapazyčanaść u 42,1 miljarda rubloŭ. U paraŭnańni z pačatkam hoda «praterminoŭka» vyrasła va ŭsich rehijonach.
Nahadajem, raniej Ministerstva justycyi Biełarusi vystupiła ź inicyjatyvaj uvieści dla fizičnych asob kryminalnuju adkaznaść za ŭchileńnie ad pahašeńnia kredytorskaj zapazyčanaści. Ciapier heta pakarańnie praduhledžana tolki dla ipešnikaŭ i jurydyčnych asob. Kab prymianiać hetuju mieru pakarańnia i dla fizičnych asob, Miniust prapanuje ŭnieści papraŭki ŭ 242 artykuł Kryminalnaha kodeksa «Uchileńnie ad pahašeńnia kredytorskaj zapazyčanaści». Akramia taho, biełarusam z praterminavanymi płaciažami pa kredytach prapanujecca adklučać internet i mabilnuju suviaź.
Treba adznačyć, što siaredniestatystyčny biełarus chutčej układčyk, čym kredytaatrymalnik: na 1 lipienia fizasoby raźmiaścili ŭ bankach depazity na ahulnuju sumu ŭ 174 tryljona rubloŭ. Heta značyć, u pieraliku na kožnaha žychara Biełarusi prypadaje amal pa 18,4 miljona rubloŭ układu. Pry hetym u nacvalucie fizasoby zachoŭvajuć u bankach tolki 49,3 tryljona rubloŭ, astatniuju sumu — u dalarach.
