Napiaredadni dyjałohu ab pravach čałavieka pa linii Biełaruś — ES Mižnarodnaja fiederacyja za pravy čałavieka (FIDH) i zakryty biełaruskimi ŭładami pravaabarončy centr «Viasna» źviarnulisia da jeŭrakamisara pa pytańniach pašyreńnia i palityki dobrasusiedstva Jochaniesa Chana, viarchoŭnaha pradstaŭnika ES pa źniešniaj palitycy Fiederyki Mahieryni, a taksama da členaŭ rabočych hrup Jeŭrasajuza pa pravach čałavieka i pa Uschodniaj Jeŭropie i Centralnaj Azii z sumiesnaj zajavaj.
Pravaabaroncy zaklikajuć Jeŭrasajuz «być vielmi aściarožnym u pieramovach pa pravach čałavieka ź Biełaruśsiu i akreślić kankretnyja ŭmovy ŭ adpaviednaści z kirujučymi pryncypami ES u halinie pravoŭ čałavieka i demakratyi», paviedamlaje sajt spring96.org.
Uličvajučy, što vyrašeńnie situacyi z pravami čałavieka «źjaŭlajecca pytańniem palityčnaj voli, a nie techničnych akaličnaściaŭ», pradstaŭniki pravaabarončych arhanizacyj ličać: dyjałoh pa tematycy pravoŭ čałavieka ź Minskam moža być naładžany tolki ŭ vypadku vykanańnia troch umoŭ.
Pa-pieršaje, «dyjałoh pavinien hruntavacca na vyrazna akreślenych palityčnych abaviazacielstvach». «ES pavinien imknucca atrymać abaviazacielstvy pa reformach na samym vysokim palityčnym uzroŭni, pierš čym dyjałoh pa pravach čałavieka budzie stvorany, kab abmierkavać realizacyju hetych reformaŭ», — adznačajecca ŭ zajavie.
Jaho aŭtary ličać, što ŭ dyjałohu ź Minskam ES pavinien padkreślivać nieabchodnaść vyzvaleńnia palitźniavolenych jak pieradumovu dla lubych zachadaŭ pa narmalizacyi dvuchbakovych adnosin. Jeŭrasajuz taksama pavinien nastojvać na pryniaćci biełaruskim bokam farmalnaj palityčnaj dekłaracyi z hetaj nahody.
Pa-druhoje, adznačajecca ŭ zajavie, dyjałoh pavinien zabiaśpiečyć kanstruktyŭny ŭdzieł u im členaŭ hramadzianskaj supolnaści. «ES pavinien imknucca atrymać aficyjnyja harantyi taho, što represii ŭ dačynieńni da mirnaj dziejnaści hramadzianskaj supolnaści buduć spynienyja i što biełaruskija ŭłady pryznajuć lehitymnaść niezaležnaj hramadzianskaj supolnaści», — padkreślivajuć pravaabaroncy.
Pa-treciaje, pavodle ich mierkavańnia, dyjałoh pavinien realizavać «darožnuju kartu» pa pravach čałavieka. Jana pavinna nabyć formu padrabiaznaha płana dziejańniaŭ, jaki b vyrazna akreśliŭ aryjenciry, abaviazki i časavyja miežy dla praviadzieńnia reformaŭ. «Darožnaja karta pa pravach čałavieka pavinna być maksimalna poŭna prapanavanaja jak častka šyrejšaj prahramy, skiravanaj na vykarystańnie efiektyŭnaha ŭzajemadziejańnia palityki i instrumientaŭ, dastupnych dla dasiahnieńnia pastaŭlenych met», — skazana ŭ zajavie.
Nahadajem, pieršy raŭnd dyjałohu ab pravach čałavieka pa linii Biełaruś — ES adbyŭsia 28 lipienia ŭ Brusieli. Biełaruskuju delehacyju na pieramovach uznačalvaŭ načalnik hałoŭnaha ŭpraŭleńnia šmatbakovaj dypłamatyi MZS Juryj Ambrazievič, delehacyju Jeŭrasajuza — načalnik upraŭleńnia pravoŭ čałavieka i demakratyi Jeŭrapiejskaj słužby źniešnich dziejańniaŭ Silvia Hanzata.
Ministerstva zamiežnych spraŭ Biełarusi acharaktaryzavała pieramovy jak «ščyry i pavažlivy abmien mierkavańniami pa sutnaści pytańniaŭ». «Abmierkavanyja roznyja pytańni, uklučajučy stvareńnie nacyjanalnaha instytuta pa pravach čałavieka, tematyku svabody słova, vykazvańnia i schodaŭ, prymianieńnia śmiarotnaj kary, baraćby ź vidami abychodžańnia, jakija źnievažajuć čałaviečuju hodnaść, a taksama vykanańnia pravoŭ dziciaci. U miežach šmatbakovaha supracoŭnictva Biełaruś i ES taksama abmierkavali pytańni ŭzajemadziejańnia ŭ AAN», — havaryłasia ŭ pres-relizie MZS.
